Timit Kuang Kahdohnak Ah SAC Ralkap 10 Leng An Thi

Nizan Timit kuang kahdohnak ah SAC ralkap 10 hrawng an thi i, CDF-Hakha in chungtel pakhat a nunnak a liam ve, tiah CDF chungtel hna sinin theih a si. “Timit in kehlei kam a sancemnak tlang ah ralhrang an rak kai i 11:00am in kahdohnak ai thawk. Chum a zaam tuk ruangah ralhrang pawl hmuh khawh an si bak lo. “11:10am hrawngah ralhrang lei RPG kuan cu kan hawile umnak bak ah a tla i, Hakha in kan hawipa pakhat a nunnak liam. 1:30pm tiang ah kahdohnak a dih rih lo.

“Ralhrang pawl nih tlang a sancemnak hmuhma an kan chuh khawh! Ralhrang lei hriamnam i in awk a that ti lo ruangah kan hawile hnu ah an pil. Ralhrang lei in 10 cung cu an thih lai zumh a si. CDF-Hakha in pakhat a nunnak liam i pahnih hliamhma an pu,” CDF-Thantlang chungtel pakhat nih a kan thanh.

Thawngdang – Nizaan August 25 zaanlei ah a cangmi Hakha-Thantlang karlak Timit kuang pawng kahdohnak ah CDF-Hakha in Salai Than Hei Lian nih ram le miphun ca ah a nunnak a pek, tiah theih a si. Thil sining a theitu minung pakhat nih cun SAC ralkap kahmi bomb nih a khen caah a nunnak a liam, tiah a chim.

July 30 in nihin August 25 tiang Timit kiangkap, Hakha khuachung le khualeng ah kahdohnak pehzul in a chuak peng i, SAC ralkap lei in 50 hrawng an thi lai, tiah CNA chimphuan nawlngeitu Salai Htet Ni nih Aug 21 ah khan The Chin Post ah a rak chim. Crd; The Chin Post

Be the first to comment

Leave a Reply

Your email address will not be published.


*