TUZAN A CAWLCANGH NING AUNG LAH NIH A CHIM CANG,

Tuzan an i phomhnak konghe pehtlaiin Aung La Nsang nih mipi sin ah bia a chim cang. Aung La Nsang nih a chimmi cu tuzan kan puai ah zeidah ka tuah aharh timi cu ka fiang ngaingai cang. Aa ka chimh cawnpiaktu hna ka zumh tuk hna i, thatein an ka chimh peng ko. Cucaah dirhmun sang ka phanh hi ka zumh bak. Kawlram mipi caah tutan puai hi teinak ka co lai.

Ka hloh mi Middleweigh Champion taisawmh lak tthan dingah tutan puai cu teinak ka hmuh hrimhrim a hau. Ka dawttukmi kawlram mipi hna lungtling an um khawhnak dingah ka thaazaang dihlak chuah in kaa zuam lai tiah a chim. Aung La Nsang le Ataides cu tutan kawlram caan in zanlei suimilam pasarih ah an i phomh cang lai. Tutan ah teinak a hmuh asi ahcun Champion a simi Ridder a zuamcawh khawh cang lai.

Ataides nih a rak chim ve mi cu Aung La Nsang hi round hnihnak ah ka tei lai tiah a rak chim. Tutan ah Aung La Nsang he aa phomh dingmi Ataides hi One Championship ah voikhat hmanh Aung La Nsang he aa thong ballomi an si. Tutan hi a voikhatnak an i phomhnak dingmi a si. Champion a simi Ridder hi an rak tei veve lo. Aung La Nsang le Ataides cu tuzan apuai nganak ah aa thong ding an si.

Mipi nih zohkhawhnak ding cu US a ummi caah zinglei suimilam pariat le cheu Bleacher Report TV le Youtube ah live in zohkhawh asi lai i, Tuluk a ummi caah zan suimilam pariat le cheu ah iQiyi ah Live in zohkhawh a si lai. India a ummi caah Hotstar le Star Sports Select 1 ah zanlei suimilam paruk in zohkhawh asi lai. Malaysia ummi caah RTM Sport in zanlei suimilam pariat le cheu ah zohkhawh asi lai. Kawlram a ummi caah Skynet Sport 3/HD in zanlei suimilam pariat le cheu in live an thok lai.

Cabia dang:Surkhua RC Father aa phuang cang. Surkhua Pastor le RC Father hi Ralkap he pethlaihnak an ngeih ruang ah kan tlaih mi hna a si tiah CDF-Hakha nih Khonumthung News sin ah an chim. Chin ramkulh, Hakha peng, Surkhua RC Father le Pastor pakhat cu CDF-Hakha nih an tlaih hna i chikhat an hren chung rih hna tiah nizaan in thawng theih cio asi.Hi kong he pehtlai in Khonumthung News zong nih CDF-Hakha sin ah pehtlaihnak an tuah hnu ah a tu bantuk in thawngpang an hun langhter than hi asi.

Surkhua RC Father pa hi Ralkap he pehtlaihnak a ngei mi asi. Cun tutan Hakha a kal zong hi Ralkap nih an auh caah a kal mi a si timi thawngpang kan theih. Cu caah ralhrang he pehtlaihnak a ngei timi ruang ah kan tlaih mi a si.Kan tlaih i biahal nak zong tha tein kan tuah cang. A mah zong nih Ralkap he pehtlaihnak ka ngei ko tiah fiang tein a chim cang. Cu caah zeitin hmanh in kan tuah lai lo, humhimnak kan ruah caah chikhat kan hren chung mi a si ko tiah CDF-Hakha nih an chim hi a si. Surkhua ah a um mi Police Sakhan cu CDF-Hakha nih May 8 ah an rak lak.

Cu hnu ah Ralkap pawl an rak kai tthan i May 31 le June 1, 2021 ah fak ngai in CDF-Hakha le Ralkap pawl an i kap than. Cu raldohnak ruang ah Surkhua telh in, pawngkam khua 10 leng nih khua an zam tak. Midang khuami an rak zam dih lio ah RC Father hi cu a rak zam lo, khua ah a rak um ko i cu ahcun Ralkap pawl he pehtlaihnak a ngeih hi a si tiah CDF-Hakha nih cun an langhter. Source: Khonumthung News

Be the first to comment

Leave a Reply

Your email address will not be published.


*