ZOHHMANH U, PATHIAN TUFA KHI ( BEHOLD THE LAMB OF GOD)

Zohhmanh U, Pathian Tufa Khi ( Behold the Lamb of God)!Thisen chuah lo cun sual ngaihthiamnak a um kho lo tiah Cathiang nih ati ( Heb 9:22). Cahlun kan rel tikah Abel nih mah biatak hi a hngalh caah asi lai, tu kha raithawinak ah Pathian sin ah a peek. A raithawinak nih ara lai dingmi Messiah kha a hmuhsak. Amah pakhat caah satil pakhat a rak thi. Noah nih cun a chungkhar dihlak caah satil, tuu asi lai tiah an ruah, pakhat kha rai a thawi ve.

Iziptram i sal a tangmi Israelmi nih an chungkhar cio caah tuu, asilo le, meheh pakhat kha an thah i a thisen kha innkaba ah hmun thumah an neh hna. Khatikhan thihnak in fater paohpaoh an luat. Ramcar a phanmi Israelmi nih an phun dihlak caah kum khat voikhat an sualnak in ngaihthiam an si i Jehovah he an i remnak lai meheh pakhat kha an thah i rai an thawi lengmang.

Cathar chan a hungphan i, tipilpetu Johan nih, Israrlmi ca lawng si ti lo in vawleimi vialte sualnak a kalpitu Pathian Tufa Jesuh Khrih kha zoh a kan fial. Huasomten atanglei Pathian bia hi rel hmanh. Johan 1:29 Zohhmanh u, vawlei sualnak a kal pitu Pathian tufa khi! A chan lio i phungchim minthang Spurgeon cu London khua i Crystal Palace ah phungchim an sawm.

Surrey Garden pulpit kha i pumhnak caah an thim piak. Mah khaan i phungchim tikah ka aw hi a fiang kho te hnga maw ti hneksak duh ah a caanphak hlan ni hnihthum duh ava kal. Mi an um lo tiin a ruah. Pulpit cung cun zeidang chim lo in acung i kan relmi Johan 1:29 kha thang nawn in zoh lo in a chim. Thilri lak ah a rak ummi riantuantu pa nih a theih.

Mah Bia nih khan a lungthin cu feikah bak in a van kah. Vancunglei in hlah maw a rat ti phun in a tem. A sual kha hngalhter a si. A thilri ai kenmi hna a chiahta hna i innah a tin. Cun vawlei sualnak a kalpitu Pathian Tufa, Jesuh Khrih kha a van zoh, a van zumh i hnangamnak a ngei i khamhnak a co.P Nihin cu zarhpini kan phan than. Cucaah
khamhnak kong theu kan hrawmh than ko hna hih.

Kan ram dirhmun hi zoh tikah thinphannak le thlalaunak lawngte in a khat. Kan ruah lo pipi nih an kan liam tak. A kal chungmi hna hi vanah kan ton te ko hna lai ti kan hngalh ahcun tuar hi a nem tuk ko. Sihmanhsehlaw khmahnak co lo bu in a thimi hna an um ahcun lungfah hi celh ding asi lo. Cucaah khamhnak kong hi buaipi cem dingah ka ruah ko.

Mi nih khamh an co ahcun Pathian fa an si caah, Bawipa kha an tukhal asi cawlh. Cucaah Jesuh nih a turun cu a kan ven cang. Kan Tukhal Jesuh vennak chung i um hnak in himnak hmun a um ti lo ( Sam 23; Johan 10:11). Hla ah pei kan sak kha: Zohhmanh u sualnak, a kalpitu khi, thihnak Kalvari tlang cungah. Vailamtahnak thing cungah khanlan tar, keimah ca a thisen a luang cang,” tiin ( ZBC 139). Minung pakhat ca, chungkhar ca, miphun ca le vawlei pumpi ca i asimi, kan ca i vailamtah cungah a thimi, Pathian Tufa, Jesuh Khrih cu zoh ko. Na sualnak i donhter hlah. An khamh lai i an huhphenh ko lai. Amen! Credit: Thio Za

Be the first to comment

Leave a Reply

Your email address will not be published.


*