THLARAU LEI MITCAW KAN UM SUAL MAW? NA LUNG DONG BAK HLAH

Mitcawt Timi Cu… Misual kan dirhmun cu thate i fian ahcun tih a nung hringhran ko. Thlaraulei ah mithi le mitlau kan rak si pinah MITCAW zong kan rak si.Thawngtha ceunak a hmu kho lo i atutiang a hrinthan rih lomi cu thlarau ah mitcaw an si ko.Laimi lawng si lo in Khrihfaram ai timi America le Philippines ram i min men khrihfa tampi lak zongah mitcaw an um len.

Mitcawt hi phun hnih a um: taksa mitcawt le thlaraulei mitcawt ti in. Taksa mitcawt cu kan hmuhmi le kan theih dihmi asi ko i hrilhfiah a herh lo. Taksa mitcawt le thlarau mitcawt ahhin thlarau mitcawt hi tih a nung deuh ving. Aruang cu na thlarau mit a cawt ahcun na hrinthan lo tinak asi i Pathian pennak chungah na lut kho lai lo ( Johan 3:3). Zungzal in hell ah na tla lai.

Cucaah pei Jesuh nih Laodisia khrihfabu kha, Mitcaw, tak lawng i a ummi na si kha nai hngal lo, atinak asi cu ( Bia 3:17). Mitcawt thai asian hna lo caah, Na mit nih khua a hmuhnak hnga mitfah si zong ka sinin rak i cawk,” ati khah ( Bia 3:18). Thlarau mitcawmi dirhmun hi a tlangpi in phun hnih a um. Mah kong cu kan zoh hmanh lai.

Pakhatnak : Misual Khamh Hau Ka Si Ti Ai Hmu Kho Lo. Filipi thongbawi nih khamh hau ka si ti ai hmuh hlanah cun Paul le Silas kha thong chung chinah a chiah hna i an kee kha hreng a khenh thulh hna. Sihmanhseh law khazan lila ah Thiang Thlarau nih misual khamh hau asinak a van hngalhter hnu cun Paul le Silas kha, Khamh ka sinak hnga zeidah ka tuah lai,” tiah an hmaiah a bok i ther lengmang in bia a hal hna ( Lam 16:30). Mitcaw ka si ti nai hngalh lo ahcun khamhconak kong hi na buaipi bal lai lo.

Pahnihnak: Khamh Conak Dingah Vailamtah I Khrih Athihnak le Thawhthannak Hi Abiapi In An Hmu Lo. Thlarau mitcawmi nihcun khamhconak dingah anmah sinak le tuahnak kha an i bochan. Pathian dawtnak le velngeihnak ai phuannak vailamtah kha an zoh in an hmu duh lo. Velngeihnak in khamh ka si, khamhnak cu Pathian laksawng asi ti an hmu kho bak lo ( Efes 2:8,9).

An cung i a ceumi thawngtha ceunak kha hi vawlei pathian nih hmu lo in a umter hna ( 2Kor 4:3,4). An lungthin kha a mui ( Efes 4:18). Isrselmi kha rul nih a cuk hna tik ah thi lo in an nunnak lai Moses tarmi dar rul zoh kha Pathian nih a fial hna. Nawlngai in dar rul a zohmi paoh an dam ko ( Number 21: 9). Khakha vailam cung i misualmi kan caah a thimi Jesuh hmuhsaknak arak si ( Johan 3: 14,15).

Mah caparte a relmi lakah thlaraulei mitcaw nan um sual maw? Na lung dong hlah. Jesuh vawlei cung i a rat cu mitcawmi hna khua hmuhter dingah asi ( Luke 4:18). Khamhnak co na duh tak ahcun, misual ka si, khamh hau ka si tiin na caa i vailam cung i a thimi le a thothanmi Jesuh Khrih lawng kha ZOH ko. Asinah kal law an khamh ko lai. Hla ahpei kan sak lengmang ko cu. Vailam tahnak cungah tarmi nan hmuh tikah, Cikkhatte ah nunnak nan hmuh lai.

Cusica sualmi nih ZOH in kawl tuah u, Vailamtahnak an tarmi ZOH tuah,” tiin ( ZBC-130). Thlaraulei mit dei ciami nih biatak kan fian chinnak caah le midang kan cawpiak thiam deuhnak hnga caah siseh, thlaraulei ah mitcawmi kan um sual le kanmit khua a hmuhnak ding caah bawmtu asinak lai mah capar hi Bawipa nih thlua kan chuah piak ko seh mu.Amen! Aherhmi an um ko. SHARE ko, nai chir lai lo.

Be the first to comment

Leave a Reply

Your email address will not be published.


*