REV. DR. G. ZA THIO: THIH NAK PHUN SARIH

Thihnak Phun Sarih: Baibal chung i thihnak nih a sawh duhmi cu i then asi lole, tuan hnga tuan khawh lo hi asi. Pathian bia chungah thihnak hi phun 7 kan hmuh. Mah chung in phun thum kong cu June nihnih ah ka tial cang. Atucu kan fian chinchin nak lai a phun 7 ning in a tanglei bang kan zoh rih lai. Pakhatnak. Thlaraulei Thihnak ( Spiritual Death) Efes 2:1; Rom 6:23.

Pahnihnak. Pumsa Thihnak ( Physical Death)- Heb 9:27. Pathumnak. Thih Hnihnak ( Second Death) Bia 20:15. Palinak. Dirhmunlei Thihnak ( Positional Death) Rom 6:1-4; Gal 2:20; Kol 2:12,30; 3:3. Panganak. Caan Tlawmpal Thihnak ( Temporal Death)Jame 1:15; Rom 8:2,6,13; 1Tim 5:6. Paruknak. Nupa Sualnaklei Thihnak ( Sexual Death)Rom 4:19-20; Heb 11:11,12. Pasarihnak. Tuahnaklei Thihnak ( Operational Death) Jame 2:26; 1Tim 5:6.

Pakhatnak in pathumbak tiang thihnak kong cu ka tial cang. Mah thihnak phun thum cu minung kan dihlak he ai pehtlaimi an si. Hrinthan rih lomi caah asi khun kan ti lai. Palinak in pasarihnak tiang cu zumtu kan caah asi khun. Amah bel pa ruknak tu cu mi zapi he ai pehtlai thiam. Mah pasarih kong fiannak dingah ka tialmi lawng rel cu aza lo, Baibal ca he zohchih in rel ah a fiang khun.

Palinak asimi Dirhmun Thihnak timi cu hihi asi. Zumtu paoh cu Khrih thihnak, vuinak le a thawhthannak kha ai tommi kan si caah ( Rom 6:1-4), sualnak kha kan thih taak i dinnak ah a nung dingmi kan si. Khrih he vailam ah thah ti kan si cu sualnak sal kan si ti lonak hnga caah asi ( Rom 6:6). Cucaah sual thawnnak he ai then kho kan si cang.Sualnak nih cun a uk hrimhrim in uk ti lo ding in um kho kan si ( Rom 6:14).

Sual cu kan thih taak cang! Caan tlawmpal thihnak timi cu zumtu kan si hnu ah tonmi asi. Kan sual ruangah Pathian he caan tlawmpal i hawikom kho lo i kan um i kan i then karlak dirhmun khi chim duhmi asi. Fapa tlaupa a pa sin in ai then karlak dirhmuh phun asi. Kan sual ko bu cun kan Pa he kan i hawikomhnak a cat ta tawn. Panganak zawn i Pathian bia kha rel hna mu. Paruknak zawn i nupa sualnaklei thihnak cu Abraham kongah kan hmuh.

Kum 100 deng asi khan cun mithi bantuk asi ko cang tiah Baibal nih ati ( Rom 4:19). Chim duhmi cu Sarah he nuva sinak an ngei kho lo tinak asi. Mah hi cu kum upat tik cun ton ciomi asi ko. Pasarihnak i Tuahnaklei Thihnak timi cu zumtu tampi nih kan ton lengmang. Jame 2:14-26 chungah fiang ten kan hmuh. Pum cu thlarau nih a chuahtak tikah a thih bantuk in zumhnak zong tuahnak lo in a thi ve tiah Jame nih ati ( Jame 2:26).

Zumhnak cu rianah a langh phung asi. Kan langhter lo ahcun kan zumhnak cu midang caah a thimi bantuk asi. Baibal chung in theihtleimi kan i cawnpiaknak asi caah biatak lei ah a kan hruaitu si ding in Pathian Thlarau nih kan fianter ko seh! Pathian ni asi hih. Na siaherhmi hrawmh ve hna. Credit: Rev. Dr. G. Za Thio

Be the first to comment

Leave a Reply

Your email address will not be published.


*