PHUNG A CHIM LIO AH THANG NGAI IN PHONE A RA

Biakinn chung ah pastor nih thawngțha a chim cingling lio ah phone pakhat cu a thawng thang taktak in a ring. Mi zapi mit cu phone ngeitu pa sin ah a phan dih. phone ngeitu pa zong a hmai chia ngai. Pumh țian tikah cun midang nih amah kha an zochih.A hawi le nih cun ziah Biakinn chung ahcun na phone cu silent ah na chiah lo tiah an mawhchiat.

Inn a phanh tikah a nupi nih na ka mualpho bak tiah a thin hung i chawnh duh lo bantuk in a um hoi. Phone ngeitu pa zong amah daithlang mi a si caah chim awk a ngeilo i, a ningzah he a lungretheih he a hnu ahcun beer dawr lei ah a choi. Beer dawr ah Biakinn i thil a cang mi kha a ruah pah in beer kha a ding i tam nawn a ding. Cun beer hrai a lak nak ah beer thol kha a kut nih a pah sual i beer thol cu cabuai tangah a tla i a kuai dih.

Mi nih an zoh dih, a lau tuk. Ni hin biakinn ah ka mualpho cang i a tu beer dawr zong ah ka mualpho țhan hoi tiah a ti i a ning a zak. A kan mawhchiat dih hoi ko lai tiah a ruah i a thin a phang cia cang. Asinain A pawngah a țhu mi mi(3) kha an tho cawlh i a sin ah a ra i unau pa na hliam sual maw? zeidah kan bawmh lai an ti i, amah kha a kai tho i, a hni puan i beer nih a peh sual mi pawl kha tissue paper in an hnawh piak.

Waiter(2) kha an rak tli cawlh i ka pu a poilo, a poilo tiah an ti i, palang keh hna kha thiang tein an phiah i an fim piak. Dawr chung i a um mi customer pawl nih an mawhchiat lo i, nih bu tein an zoh. Dawr Manager pa nih beer athar tholkhat kha a cabuai cungah a chiah piakțhan i, Sualpalhnak le tisualnak hi zeitik caan paoh ah a chuak kho, Ralring thiam hi a biapi tiah a nih bu tein a chim.

Cu pa cu minung nunning hi a mak a tituk cang. Tuzing a mual pho nak hmun cu zumtu, mipiangthar, Pathian mi pawl umnak Biakinn ah a si i, thil hme te a ti sual ruang ah an sik, an mawhchiat, atu a umnak mițhalo pawl biangailo pawl mi nih kutdongsawh mi pawl um nak zuu dawr ahcun, thil hmete a ti sual i Kan mawhchiat lo pin ah thazaang an pek lehlam tiah khuaruah har phu si.

A ngaingai kan ti ahcun Biakinn chung a phanmi pawl tu nih beer dawr i a um mi pawl i lungput hi pu deuh ding an si. Khrihfa nun ah hin Discipline,dun le dan khauhtuk le,rek tuk le,thildik țanh tuk mi hi mah caah cun a țha tuk ko lai nain midang caah cun a dik hlu lo. Minung hi sualpalh kho mi lawng te kan sidih..thil hme te a sualpalh mikha kan chimceih a tam ah cun thil ngan pi sualnak ah a cang.

Biakinn he aa hlat mi pawl Biakinn naih ding i sawmnak hmun Biakinn kha. Biakinn naih cia mi pawl Biakinn he hlat ding in i țhawlnak hmun a si sual lai tiah. Diknak timi hi Discipline pawl, dun le dan zulhding pawl fekte in zulhnak le tlaihnak cung ah aa hngat lo. Minung pakhat le pakhat i hawi kawm nak ahcun i hngalhthiam nak a si mi, zawnruahnak hi a țha bik ko. By Patrick Savang

Be the first to comment

Leave a Reply

Your email address will not be published.


*