MAH LE MAH I DAWT HI BAIBAL AH NA HMU MAW?

Mah le mah i dawt hi Baibal ah na hmu maw? Zumtu tampi nih mah le mah le mah i dawt hi sualnak bantuk in an zoh i an ruah palh tawnmi a si. Mah le mah i dawt hi midang nakin a biapi deuh le a tha deuh le a sang deuh ah i ruah a si tiah an ruah tawn, cun mah ca thatnak lawng ruahnak, mahzawn lawng ruahnak, midang zawnruah lonak, mah i thangthatnak le i porhlawtnak ah an ruah tawn.

A si lo. Hihi mah le mah i dawt timi nih a chim duhmi a si lo. Mah le mah i dawt timi cu keimah cu misual kan si i vel thawngin khamhmi ka si, tiah mah tein i hmuh a si. Pathian sermi, sunhlawih mi le dawtmi, Khrih pum tengnge chungah laksawng pekmi le Pathian muisam a kengmi kan si tiah i hmuh a si. Kanmah le kanmah dik tein kan i dawt khawhnak ding ah Pathian nih a kan dawt hmasa.

Kanmah le kanmah kan i dawt thiamnak ding ah Thiang Thlarau pek kan si i kan chungah a nung. Baibal nih ‘Nangmah le nangmah naa dawt lai’ tiah fiangro in a chim lo nain mah le mah i dawt hi baibal cawnpiaknak si dawh a si ko. Zeicahtiah kan pumsa runvennak kong a kan cawnpiak (1 Kor 6:12-20), thianghlim tein chiahter a kan duh.

Kan lungthin, kan hmurka, ka mit le kan kut-ke te hna hi ven a kan fial (Phungthlukbia 4:23-27) i, ningcang loin ei le din te hna kan i ral a hauh ning a kan cawnpiak. Pathian cu ningcang te le dawh tein minung a dawmi a si bantuk in dawh tein mah le mah i dawt hi a kan fialmi a si. Nawlbia te hna hi midang va dawt thiamnak ding le harsatnak va pek lonak ding ca lawng an si lo.

Kanmah i dawt thiamnak ding le buainak in kan i runvennak ding ca zong an si ve. Jesuh nih Tlang cung cawnpiaknak (Matt 5-7) ah a cawnpiak mi vialte hna khi kanmah i runvennak le i dawtnak thiamnak ding an si ve. Cucaah mah le mah i dawt hi a biapi tuk. Credit: Thomas L. Than Kep

Be the first to comment

Leave a Reply

Your email address will not be published.


*