KHAMH FIANNAK, ZEI CAAH DAH A HERH? BY REV. DR. G. ZA THIO

Khamhfiannak, Zeicaahdah A Herh? Relding: I Johan 1:4; 4:4; Rom 9:2;10:1; Heb 2:14,15. 1Johan 1:4 Hi ca kan in kuat hna cu nan i lawmhnak kha a tlinnak hnga caah asi. Khamh co le khamh fian cu an khat deuh lo. Khamh co cu van kainak caah asi i khamh fian cu khrihfa nun he ai pehtlai. Khamh a co ko nain khamh ai fiang lomi an um tawn. Khamh a co le cangka khamh ai fiangmi an um ve.

Zeicaahtiah khamh co( hrinthan) cu thlitu hran he Jesuh nih a tahchun khah ( Johan 3:8). Thlitu cu fakdeuh a hran le kan theih i dinte a hran le kan thei lem lo. Cuve bang kan hrinthan tikah ai fiang cawlh kan um bang, ai fiang cawlh lo mi an um len ve. Baibal kan zoh tik zongah kan hmuh. Johan thawngtha cauk hi khamh conak caah Johan nih a tial ( Johan 20:30,31) i, Johan cakuat pakhatnak tu cu khamh ai fiang lomi hna an i fiannak, asi lo, zungzal nunnak kan ngei ti ai hnal lomi hna an i hngalh
khawhnak caah a tial ( 1Johan 5:13).

Chinmi lakah thlaraulei i kan pa arak simi Dr. Hau Lian Kham kha, Zeitikah dah na hrinthan? tiah ka rak hal. Hitin a ka leh. Ka hngakchiatten ka hrinthan ko. Amahbel ka upat hnu, cuhmanhah pastor ka tuan hnu in khamh kai fiang, ati. Mifim bialeh ciammam. Kei he cun kan i lo lo. Kei cu ka hrinthan le cangka fiannak ka rak ngei cawlh. Khamh fian a herhnak kong cu atanglei hna caah asi.

Khrihfa nun he ai pehtlai ka ti cang khah. Baibal sianginn thatha le khrihfabu tampi nih, khrihfa nun kan cawng cang lai an ti paoh ahcun khamh fiannak ( Assurance of Salvation) kong in an thok zungzal. Pastor le evangelist tampi zong nih khamhnak a co kami kha khamh fiannak kong hi an cawnpiak zungzal hna. Zeicaahdah khamh fian a herh kan ti ahcun: 1. Lawmhnak a tlin deuhnak dingah.

I Johan 1:4 Hi ca kan in kuat hna cu nan i lawmhnak kha a tlinnak hnga caah asi. Kan Lai Baibal ahcun kan lawmhnak’ ati. Mirang ahcun ( KJV) nan i lawmhnak’ ai ti. Cakuat tha cu a kuatu nak in a hmutu an i lawm deuh. Kei zong pakhat nu he kan mit le kan umtu in kan i uar. Bia in kan i chim bal lo. Asinain voi khat cu ca a van ka kuat le ka van rel cu, Ka dawt tukmi Pa Thio…ti ka hmuh.

Kai lawmhnak cu a tling, a sang tuk i atu le atu cacawn lioah ka chuak i eekinn ah ka va rel. Aka uar, aka dawt ti kai fian cun kai lawmhnak a tling tuk cang. 2. Thlarau tlaumi hna siaherhnak a kan ngeihter. Rom 9:2 le 10:1 hi rel hmanh. Paul kha Saul ti asi lioah khrihfabu hremtu asi. A lung ai thlen i khamhnak a co hnu cun a miphun caah a lung a fak i khamh an sinak lai biatak tein thla a campiak hna i thawngtha a chimh cang hna.

Pathumnak. Satan raldohnak ah a tha tuk, ralthatnak a kan peek. 1 Johan 4:4 Nan chung i a ummi Thlarau kha vawleimi a simi hna chung i a ummi thlarau nak in a thawng deuh.Kan chungah Khrih, asi lo, Thiang Thlarau a um ti i fian ahcun khuachia doh le thawl kha kan tih ti lo, kan ral a tha cang. 4. Thih tihnak sal tannak in luatnak asi. Heb 2:15 …..thihnak an tih ruang i an nunchung vialte sal bantuk in khua asami hna kha a luatter hna nak hnga caah asi.

Jesuh nih cross i a thihnak in Khuachia kha a hrawh cang caah Khrih a zum i khamh ai fiang mi hna cu thih tihnak sal khan kan luat cang. Vawleicung i mi tampi hi thih kong an ruah paoh ah an tih dih. Siangpahrang le ralbawi pipi zong nih an tih. Mirum le minthang zong an tih. Sifak le rethei zong nih kan rak tih cio. Mihrut le Satan nih a hlenmi hna lawng nih ka tih lo an ti tawn. Kei hna cu ka hngakchiatte in thih i hell tlak lai hi ka rak tih tuk.

Taang hleithum ka rak kai lio zongah zaan khat cu thih kong ka ruat i mawlh kai tim. Sihmanhseh law ka hrinthan hnu cun kha thih tihnak zawtnak nih aka sal ti lo. Khrih nih aka luatter cang. Hallelujah! Cucaah khamh co hnu ah khamh i fian cu a tha tuk i a herh tuk. Bawipa nih a reltu le sharetu in umpi ko hna seh. Amen! By. Rev. Dr. G. Za Thio

Be the first to comment

Leave a Reply

Your email address will not be published.


*