NUG COZAH NIH D DAY A THANH CANG HIH, MIPI I RALRING CANG UH

D Day ti lengmang mi cu tuni ah phuan le thanh a si cang. National Unity Government ah caan karlak president Duwa Lashi La nih thanhnak a tuah. Myanmar caan karlak president a simi Duwa Lashi La nih tuni September ni 4 thok in state of emergency a thanh cang. Tuni September ni sarih thok in nawlngaihnak latu ralhrang kawlralkap hna cu alamkip doh asi cang tiah thanhnak an tuah.

Mipi vengtu ralkap hna nih nan mah le nan umnak i ralhrang kawlralkap le a bawmtu hna cu doh cang hna uh, Ralhrang thimmi uktu vialte a rannak in nan rian chuak cang uh, Mipi vengtu ralkap nih mipi nunnak le inn le lo kha kilveng cang uh. Cunglei upa hna chimmi ngai ulaw NUG nih kahdohnak a chuahmi kha zulh i zuam uh.

Tuni September nisarih thok in mipi umkal le chawhvah i ralring uh, ei din sii ai i chiah ulaw mipi vengtu ralkap hna kha thawngpang peknak le a dangdang in rak bawm hna uh. Tlangcung hriamtlai vialte nih hmunkhat ah ralhrang doh dh cang uh. Tuni thok in ralhrang tangah zungkai ti lo ding tiah ralrinnak an tuah cang. Atawinak tete in kan vun langhter.

Theih a phu ngaimi Cabia Dang:Kawlralkap hi zeitindah kan hrawh lai? Zeiruangah Hrawh a hauh? DVB Biahram. Lainawng Min Aung Hlaing nih fiangtein 2023 tiang nawlngaihnak kan lai tiah achim. Asinain 2022 a dih zongah 2025 ah a thawn khawhmi asi. Ralhrang hna nih hin mipi hna cu an ral bantukah an ruah peng hna. Kum 1962 ah Ne Win nih nawlngaihnak a lak in Saw Maung, Than Shwe, Khin Ngut le Min Aung Hlaing tiangin mipi duhpaoh in tuah khawh ah an ruah. Ralkap bokhat in a lubik tiang nih mipi hna cu Sal bantuk in tuah dingah an ruah. Hihi chim sawhmi asi lo, ralkap chungah sal bantukin ralkap bokhat nih bohnih nih a tuahning asi. Cubantukin a bawi lo deuh mi kha amah nak in a bawi deuh mi nih aduh paoh in a tuah ve.

Cu an nunning bantukin Yangon Mandalay khuapi dangdang zongah siseh lampi zongah nan mah nu pawl, nan fanu le kan tlaihhrem piak hna lai.Thih na ngamh ahcun rak chuak uh tibantuk in an au hna. Ralhrang hna nih tlangcung mi umnak hmun ah sankhat hnu sankhat in thilsual taktak aphuntling an tuahmi zong theih le hmuh a si. Cucaah ralkap hi hrawh lawlaw lawngah angah lai ti a fiang. Ralkap hi logistic bantukin hrawh khawh asi lo ti cu kan theih cio. Asikun ah ralkap hi hrawh khawh asi lo kan ti ahcun zeitindah kan tuah lai.

Aliamcia kum 8 chungah Aung San Suu Kyi kha ralkap kut in aa pek bantukin a si khawh chungin ralkap pawl a lem hna i an lungtlinter a timh. A sikhawh chungin tangdor le nemtein a thlem peng ko hna nain a donghnak ahcun a tu dirhmun hi aa kan phakpi thiamthiam. Ralkap hrawh khawh asi le silo kongah biaelnak tampi a um. Afiang mi cu ramdang bawmhnak tel lo cun thilfawi asi lo.Ram dang bawmhnak tel lo cun caan sau a rau lai. Rianrang in kan duh asi ahcun atak in thil a cangmi kha ruah hmasa a hau. Zeitindah kan doh lai. tangka hmangin kan doh lai. Zeitindah tangka kan kawl lai. CRPH in angahmi 9 millions hi hman a hau lai. Tangka cu zeitindah hman asi lai. Zeitindah a kuatnak ding. Hriamnam le minung zeitindah kan khawmh lai.

Zeitindah command structure kan dirh lai, tukdohnak le ramkhel zeitindah kan kalpi khawh lai, abia cun a fawite nain a taktak in hlawh atling ding cu thilfawi a si lo. Timhtuahnak tha ngei loin kan doh a si ahcun kan sung lai. Vietnam ramchung buainak ah ramdang bawmhnak a tel. Proxy war pakhat asi i, kum 20 chung a rau. Supper power ngei pawl zeitindah an doh i an tei timi zoh ngaingai ahau.Zei asi zongah a fiang bak mi pakhat cu mipi, CRPH, NUG, dothlennak thinlung angeimi tlangcung hriamtlai pawl he i kawmh a hau. Cu asi lo ahcun mumal ngeiloin akuai kho dih, Cun mipi zong nih tuar in khawhnak le lungsaunak he ttan kan lak a hau ve. Ralkap hrawh timi cu, ralkap tingthum renglo kha an hriamnam lakpiak dih hna i, nan inn ah tlung uh ti sawh khi asi lo. Ralkap hna an i hruainak a hram in asang bik tiang phak ahau. Ṭhalthlipi dothlennak hi hlawhtling sehlaw tu i, ralkap hi hrawh asi lo ahcun hlawhtlinnak tlamtling kan ti kho lai lo. Credit: CT

Be the first to comment

Leave a Reply

Your email address will not be published.


*