NUG AN COHLAN NAK AN LANGHTER CANG, THAWNGTHA PAKHAT A SI

August 30, cawn nikhat ni ah tuahmi ASEAN+6 Regional Social Dialogue le NUG Online tonbiaruahnak ah ASEAN Labour Organization hna nih NUG cozah kan cohlan tiah tuanvongeitu hna nih an chim. Hi tonnak ahhin Japan, New Zealand, South Korea le Philipine ram in Labour Organization hruaitu hna zong an i tel ve. International Labour Organization i a voi 109 nak meeting ah Myanmar democracy kongah bawmhnak pek cio dingin forhfialnak an tuahmi pehzulh in ASEAN Labour Organization hna nih NUG an cohlannak an langhtermi hi a si.

NUG cohlangtu ahhin hlutdaw palai tampi zong an i tel. Cu hlutdaw palai hna nih cun anmah le an ram cozah sinah NUG Cozah cohlan dingin an hal cio fawn.Tu thla, September 14 ah a voi 75 nak UN meeting pi tuah a si lai i Myanmar ram aiawhtu cozah ah SAC maw kan cohlan lai, NUG dah timi biakhiahnak an tuah lai. UN nih Myanmar ram aiawhtu cozah ah cohlan an si khawh nakhnga SAC nih siseh NUG nih siseh an i zuam cuahmah.ASEAN Labour Organization le hlutdaw palai hna cawlcanghnak nih NUG caah tampi bawmhnak a pek lai tiah Myanmar ram riantuanbu CTUM Chairman U Maung Maung nih a chim. TCP

Cabia dang:Chuah semnak Chinram ah chungkhar tling he nuam tein ram le miphun caah rian a ttuanmi kan Chin palik pawl hna cu ralhrang kawlralkap ruangah ah mi ramdang ah cement le rawra nawng in an pumpaw cawmnak caah rian an ttuan cang ee. Zeitluk in dah hibantuk rianttuan hi an caah a har hnga mu.. Chinram an rak um lio ah khan cun hi bantuk rian cu an rak ttuan ballo ee.

Ralhrang kawlralkap uknak hitluk in an doh cuahmah lio ah kan Chinmi tthenkhat pawl ralhrang kawlralkap kuttangah rian attuan ko rihmi an um rih mi tuak tikah thinlung nih a celh hrimhrim lo. Kan Chin palik CDM atuahmi hna cu ralhrang kawlralkap kuttang i rianttuan nak cun tiah an hngakchiat tein an ttuan ballomi rian cement le rawra nawng in nifatin hlawhfa an i thim deuh ee.

Chungkhar ca nak in hmailei kan miphun le ram ca, kan te chin fapar chan tiang dirhmun cuan in, retheih thilrit zaangba tu an i thimmi zoh tikah upat lo awk an ttha lo. Hi thawngpang hi ralhrang kawlralkap kuttangah rian a ttuanmi hna nih nan hmuh tikah zeitin dah nan um ve hnga? An hmai tel nan zoh ngam hna maw? An ruah ning le nan ruahning a cuai nan tlai te ttheu ko lai dah.

Be the first to comment

Leave a Reply

Your email address will not be published.


*