KAN CHUNGKHAT CHIMCIO HNA USIH, THANHNAK AN TUAH

Thawngpang thanhnak tuah cio hna usih. Mipi humhhimtu CNO/CNDF nih Chinmi vialte sin ah thanhnak an tuah. Kan chungkhat cingla vialte thanhnak tuah cio hna usih. CNO/CNDF nih thanhnak an tuah mi cu Falam peng chung, Weibula, Var le Pamunchaung khua pawngkap hrawnghrang ah ahohmanh kal um lo dingin thanhnak an tuah. Hi hmun le hma langhtermi ah khual zong tlawn lo dingin ralrinnak an tuah.

Hi konghe pehtlaiin Tuzing ah Falam peng Locom khua ah ralhrang kawlralkap le Mipi rungvengtu ralkap hna karlak ah kahdohnak a chuak tiah khuami nih an chim. Locom khua ah hin ralhrang kawlralkap minung 50 hrawnghrang hna cu nizan June 28 ah khan an rak phan i, Sianginn ah an um. Cu ruangah khuami tthenkhat hna cu khua an chuahtaak tiah theih a si.

Tuzing suimilam pariat hrawnghrang ah Locom khua ah i kahdohnak a chuak tiah thanhnak khuami an chim hnu tlawmpal ah CNO/CNDF nih thanhnak an tuah hi a si. Tuzing Locom khua kahdohnak konghe pehtlaiin thawngpang a linhsat lio asi caah fiang tein thawngpang theih khawh asi rih lo. Cu caah CNO/CNDF nih thanhnak an tuah bantukin chungkhat vialte a cunglei langhter hmun hma ah kal lo dingin thawng i thanh cio hna usih.

Thawngpang dang:Ralhrang Chuahmi Thilri Pawl Cawk Lo Ding Le Zuar Lo Dingin TNLA Nih Nawl A Chuah.Ta’ang National Libration Army (TNLA) nih an ukmi hmunhma chungah ralhrang nih an chuahmi le anmah he aa pehtlaimi thilri poah cu June thla dih cun cawk lo ding le zuar ti lo dingin nawl a chuah i a zul lomi cu fak piin dantat a si lai tiah a thanhchih. Hi nawl chuahmi ca hi June 15 ah khan Ta’ang holh in an chuah i peng le khua hruaitu hna sinah meeting auh in an theihter dih cang hna. Kannih cu June 28 ah hi ca hi kan hmuh tiah Kuatkhai (ကွတ်ခိုင်မြို့) khuapi chung a ummi hna nih an chim. Cawk/hman lo dingin khammi hna cu Beer, kuak, Coffee, Teamix, letphetchoh, ti-thlum (အချိုရည်) Mirang vawlei (ဘိလပ်မြေ), Sahpiat, cawhnuk, a dangdang le khualtlawng mawtaw (အမြန်ယာဉ်လိုင်း) cheukhat an si.

Beer ah cun Myanmar le Dagon an i tel. Kuak ah Red Ruby le Premium Gold an i tel fawn. Khualtlawng mawtaw ah Bandulah (ဗန္ဓုလ) Shwee Mann Thu (ရွှေမန်းသူ) Than Myan Thu (သန်မြန်သူ) le Parami (ပါရမီလိုင်း) hna an i tel fawn. Hi nawlchuahmi a zul lomi cu ralrin pek an si lai i cu zong i a zulh duh hlei lo ahcun dantat a si lai tiah TNLA nih cun a thanh. Hi TNLA nawlchuahmi cu Ta’ang mipi zong nih an lungtling ngai i zulh kan i zuam lai tiah an chim. kum 40 drawing a simi pa pakhat lebang nih cun “Covid he i bawm in mipi an kan thah cuahmah. MAH rawhnak ding a si ahcun tuah a herhmi poah kan tuah ko lai” tiah a chim. Thil zuartu hna zong nih dothlennak tuah lioah ahcun a herhning poah in kan cawlcang cio lai, kan lak ciami te hi kan zuar dih cun a dang cu kan zuar ti lai lo, TNLA nih nawl a chuahmi hi kan zulh ko lai tiah an chim.

Be the first to comment

Leave a Reply

Your email address will not be published.


*