ISRAEL SUNGTHOH THIAMSANG NIH KAWLRALKAP A CHUAHTAAK CANG

Ramkip nih theihpimi le cohlanmi an si khawh nakhnga ralhrang SAC nih tangkapek dingin an hlanmi Israel ralkap lei hlathlainak lutlai hlun (Israel’s Military Intelligence Directorate) Air Ben-Menashe cu aa timh bantukin a hlawhtlin lo caah a rian in a chuak than tiah Reuter nih a tial. Mipi thimmi cozah sinin hramhram in nawlngeihnak a latu ralhrang SAC nih cun US le vawleicung ramkip nih an cohlan hna nak dingah caah riantuan piak dingin Israel ralkap hlathlainak luthlai hlun a simi Ben-Maneshe cu US tangka nuai 2 (2 millions) pek dingin an rak hlan.

Ari Ben-Menashe hi Canada ah Dickens & Madson Canada ngeitu a si. A liamcia March, 2021 lioah SAC ralbawi pakhat he i tongin hnatlaknak an rak tuahmi a si. US nih SAC cungah sipuaizi phihkharnak a tuahmi a lak/hrawh than bak in US $ 2 millions kan in pek lai tiah an rak ti. Vawleicung upadi lei thiamsang tampi nih Myanmar ralhrang he hnatlaknak tuah in rian a tuantimi cu US nih phihkharnak a tuahmi phung a buartu an si tiah Ben-Maneshe cu an soisel ngai.

Kan theih cio bantukin US nih Myanmar ralhrang cung i phihkharnak a tuahmi lak/hrawh than cu chim lo, a chap chin lengmang deuh fawn. Cutikah Ben-Menashe nih hlawhtlin khawh dingin a hmuh ti lo caah atu bantukin a chuah than hi a si. Myanmar ramchung ah CNN thawnglatu nu a rak luh khawh zong kha Ben-Maneshe thawngin a si.

Ari Ben-Menashe cu 1951 ah a chuakmi a si. Businessman, Security Consultant le Israel’s Military Intelligence Directorate a rak tuan balmi a si. Catial thiam (Author) pakhat zong a si fawn. Atu cu Canada ram ah a um. Kum 1989 ah Iran cozah sinah raldohnak vanlawng pathum zuar a rak timh ruangah an tlaih i kumhnih chung thong a rak tla bal. Phundang in chim ahcun a min a rak chia ngaimi cozah bawi pakhat a rak si. TCP

Chinmi Zumtu Hawidawt vialte hna: Ziah daitein kan um ko hna. Mi an thih cuahmah lio ah zeital kan tuah ve lai lo maw? Kan fapa Thawng Tha Thang (Rev. No Chum fapa) le a hawi le nih Yangon ah Laimi covid a zawmi hna nunnak khamh dingah zanchiar in zantin khuamang tiang curfew pah chih in oxyzen kawl ah an vahmi hi kan bomh ve awk asi hnga lo maw. Nihin bantuk muihnak le harnak can hi kan chan chungah kan tong ti hna lai lo dakaw. Khuaruah a herh cang lo maw.

Nunnak khamh ding ah Pathian nih rian tuan a kan fial cang hih. Kan ngeihchiah vialte chuah in nunnak khamhnak rian cu kan tuan bomh cio ve awk asi hnga lo maw. Chaw le vaa kan ngeihmi hna hi midang pakhat tal nunnak khamhnak ding caah hman lo in kan thih tak ahcun zeisandah a tlaih rua hnga. Cu caah u le nau hna, Yangon khuachung ah rallak salak ah minung nunnak khamh dingah riantuantu hna nih an herh bikmi “Ambulance motor car” hi ziah kan zapi bomh in cawkpiak kan zuam ko hna lo. Oxyzen dur le seh zong kan zalh hna lo.

Yangon Lai chiathat bu khuazeidah nan um. Nanmah nih kan hruai uh law fundraising kan tuah piak hram uh. Kan thawh cio lai. Ram dang Laitlai unau le Khrifabu kip zong nih kan zuan hnawh cio uh law a tha lai.Mission ee tiah kan au lengmang mi cu hihi pei mission taktak cu asi awk asi cu. Can nih a kan liamtak hlan le nunnak tampi a liam hlan ah tho uh sih law nunnak khamhnak rian tuan ti hna uh sih. Bawi Khrih min in kan sawm hna. Yangon, Mandalay, Kalaymyo, le Laitlang khua tampi zong nih an herh ko lai. Yangon in kan thok lai. Nihin ah a dam rihmi hna ziah kan thut sawhsawh ko. Kan miphun ci a mih hlan ah kan khamh hna pei a herh cu. Fakpi in khuaruah can asi cang hih. Credit: Rev.Dr. Samuel Ngun Ling

Be the first to comment

Leave a Reply

Your email address will not be published.


*