VAWLEI CUNG RALTUKNAK HELICOPTER TTHABIK APACHE KONG

Vawleicung Raltuknak Helicopter Thabik Apache Helicopter (AH-64A/D) Kong.Apache helicopter hi McDonnell Douglas (a tu ah cun Boeing, ti a si cang) nih US ralkap caah a rak ser. 1984 in khan US Army kut a phaan i, Egypt, Greece, Israel, the Netherlands, Japan, Saudi Arabia, United Arab Emirates (UAE) le the UK sin zongah an zuar.
US Army ah 800 lenglo an i ngeih i, ramdang sin an zuarmi hi 1,000 lengkai a si. 1989 i Panama an tuk lio ah US nih a hmasabik an hman a si.

Cu hnu cun Operation Desert Storm zongah an hman i, vawleicung rampumpi remdaihnak rian zong tampi a thathnem tertu a si. A bikin Turkey, Bosnia le Kosovo ko ah hin a hnathnem ngaimi hriamnaam a si. A hmasabik Apache Longbow hi 1997 April ah US Army kut a phan. Ah-64D Longbow hi Afghanistan ah Operation Iraqi Freedom lei tangin Operation Anaconda, timi min bunh in US nih a hman. Cun 2003 June thokin khan South Korea ah a hman.

AH-64D Longbow hi radar control ai ngeihmi meithal ai ngeih i, Longbow Hellfire missile zong ai ngeih. Ah-64D ah an thlenmi 501 Ah-64D Apaches pawl zong cu US Army kut ah an phan cang. 2006 August in khan a pek dih cang hna. A thar an cahmi 13 le cuhlan an cahmi 11 cu 2006 November ah khan an pek dih cang hna. 2007 January ah khan 96, cun 2007 April ah 18 baak an cah chap.2007 ah cun UAE lei zong nih AH-64D 30 bak an cah ve hna. Ahmasabik an sermi AH-64D cu 2007 June ah khan US Army sin a phan kho i, a dang an serchapmi pawl cu 2007 October ah an phan colh ve.2010 October ah khan a man ai dengdeuh mi Ah-64D Apache Block III ser than dingin US Army nih Boeing cu $247 million a pek. Ah-64D Apache Block III 50 Boeing nih a serpiak a timh hma. Ahmasabik Ah-64D Apache Block III an sermi cu 2011 October in khan US Army kut ah a phan.

Ramdang nih Apache an Cahnak le Kuatnak: 2002 May ah khan Longbow Apache 30 cu Netherlands sinah, 20 cu Singapore sinah an zorh hna. Seraph, timi Apache thar 9 le a dang 9 baak cu 2005 April ah khan Israel sinah, cun Longbow 35 cu 2007 January ah khan Egypt sinah an zorh hna. AH-64D Apache le Boeing Ah-64D Apache Block III hmasabik cu 1998 May le 2012 May karlak ah Royal Netherlands Air Force an zorh hna.AH-64A pawl cu South Korea caah AH-64D pungsan in tampi an thlenpiak hna. UAE nih an cawkmi 30 zong cu an dihlak in AH-64D Longbow pungsan in an thlenpiak dih than hna i, 2008 May in khan an kuat dih cang hna.

2006 June ah khan Saudi Arabia zong nih an cawkcia mi Apache 12 cu vun thlenpiak ve hna dingin an nawl hna. 2008 September ah khan AH-64D 12 an cawk chap hna. 2008 October ah khan Taiwan nih AH-64D Block III Apaches 30 a cah ve hna. 2001 August ah khan Japanese Ground Self-Defence Force nih AH-64D 55 bak a cah ve hna. Japan ca i an sermi hi AH-64DJP ti a si i, air-to-air missile a kaptu Stinger ai bunh. 2002 September ah khan Kuwait nih AH-64D 16 a cah. 2007 February ah avoikhatnak an kuat hna. Kuwait nih a chawkmi pawl cu BAE systems le HIDAS defensive aids system ai telmi a si. 2003 September ah khan Greece nih AH-64D Longbow 12 a cah i, HIDAS bunh dingin a chimh hna. 2007 January ah an kut a phan. 2011 June ah khan $2.5 billion dih in AH-64D Block III Apaches 30 bak a cah. 2013 – 2014 chungah kuat dingin an chim.

AH-64A/D Apache tharchuahmi. 2003 February ah khan a hmasabik thar an chuahmi Block II Apaches cu US Amry kut a phan. Block II an tharchuahmi ah hin 96 A-model apaches ah an hmanmi digital communication system cu internet he hman khawhmi system in an thlen. Cu ti an tharchuahmi helicopter cu 2006 October ah khan Boeing nih US Army kut ah ahmasabik an phakter. 2005 July tein khan Block III zong vun ser kho dingin US Army nih Boeing cu a rak fial bal i, 2011 ah khan Block III cu hman awk tha in an kut ah a phakter. 2009 December in khan cun Block III AH-64D cu test an tuah khawh cang.

Block III ah hin digital system siseh, radio hmangin a dang apache hawi le pawl he i chonhbiak khawhnak system siseh, a engine zong siseh, a monghnak system siseh, cun UAV control tuah khawnak system siseh, a pangkaa tiangin thar an chuah. A pangkaa thar an chuah hi 2004 May in khan a si cang i, thar an chuah hnu cu a tha (speed) ai dang ngaingai. Cung a kai ah le thilrit a phurh khawh ning zong ai dang ngai.Block III system le a cawlcanghnak tharchuah dingin 2006 July ah khan Boeing an fial than.

Apache Block III test an tuah hmasabik hi 2008 July ah khan a si. Block III standard hnon i thar an chuahmi pawl lawng i hman dingin US Army nih khua a khan.AH-64D pawl Block III tiangin tharchuah dingin rian an tuannak ah Boeing he a tuanti mi hi Science Engineering Services an i tel ve. AH-64D Apache pawl remhnak, zohfelnak le a thilri phoihnak pawl kongh SES hi ai thlaak te lai.Cu rian phunthum cu Huntsville ah SES nih an i ngeihmi West Aviation and Intergation Facility chungah an sermi a si.

Cu hnu cun helicopters pawl cu Mesa, Arizona lei ah an hei kuat hna. Block III sernak dingah helicopter 10 an innpi cu Boeing sinah 2012 July ah an kuat. Cu helicopter a inn (takpum) cu Korea Aerospace Industries nih an kuatmi hna a si. Mesa i an ser hmasabikmi AH-64E Apache cu 2011 October ah khan an kuat hna. Apache AH-64E model ah thlen dingin US Army nih Ah-64D models helicopters 117 cu $1.5 billion dih in an kuat than hna.AH-64E Apache 268 serpiak dingin 2017 March ah khan US Army le Boeing nih $3.5 billion man contact an tuah.2022 in cun Apache MK1 pawl hi AH-64E Apaches pawl in an zakaa rolh khawhter an si zuam. Thar an chuahmi ruangah hin ral pawl an sining a theih khawh deuh pinah, cakdeuh in ral a tuk khawhnak dingah a thazaang zong a thawnter deuh lai.

WAH-64 Longbow Apache: GKN Westland (a tu ah cun AgustaWestland ti a si), Boeing, Lockheed Martin, Northrop Grumman le Shorts pawl zong nih UK Army caah Longbow Apache ser dingin an i laang (cuh) hna. UK ah WAH-64 Longbow Apache a kua tu hi AgustaWestland a si.2001 January i a hmasabik an hmanmi helicopter cu AH mk1 a si. 67 hrawng an kuat cang hna i, a 67nak helicopter an kuatmi cu 2004 July i Farnborough Air Show an tuah lio ah a si.

Raltu kho dirhmun a phaak hi cu 2004 October khan a si i, 2005 May ah khan Army Air Corps nih an i ngeihmi helicopters 18 zong raltu kho an si cang, tiin an thanh. HMS Ocean helicopter carrier ah an phurhmi AH mk1 zong cu thatein ral a tu kho a si cang i, 2006 November ah khan HMS Ark Royal carrier ah rian an tuanter cang.

Boeing AH-64 Apache weapons: A takpum a tanglei zawn ah hin 30mm automatic Boeing M230 chain gun an bunh. Minute 1 ah zuun 625 a kah khawh. Kuanbawm le bom 1,200 tiangin ai ken khawh. AH-64D hi Lockheed Martin/Boeing AGM-114D Longbow Hellfire air-to-surface missile ai ngeih. Cu bom nih cun 8km in 12km hlaat tiang a kah khawh.Apache ah hin air-to-air kahnak missile (Stinger, AIM-9 Sidewinder, Mistral and Sidearm) an bunh khawh i, an i tinhnak zawn thatein kahkhawhnak system ai ngeih.

Cu hriamnaam cu computer in control mi le control lo mi 70mm rockets pawl an si. Laser in control khawhmi Hydra hriamnaam pawl zong ser dingin FY2008 budget ah telhchih cang. 2006 April ah khan hriamnam tharchuahnak dingah US Army nih BAE Systems a fial. British Army nih an i ngeihmi AH mk1 pawl hi cu CRV7 70mm rocket system an bunh. Cu hriamnaam cu Bristol Aerospace of Winnipeg, Mantitoba sinin an laakmi a si.Longbow Apaches nih hin hriamnaam phunhnih ai ken ve. Hellfire missiles 16 cu four-rail launchers 4 ah le air-to-air missiles 4 ah an bunh.

Sensors of Apache attack helicopter: AH-64D Longbow Apache hi cu Northrop Grumman milimetre-wave Longbow radar an bunh. Hi hriamnaam nih hin a cawlcang theng lo mi ral sakhaan le ral pawl nih an hmanmi radar pawl a umnak a thei khotu a si. Millimetre wave i a thatnak cu, minung mit in thitha in khua hmuh lo caan ah a tangkai ngaingai i, tanglei (vawlei) i thil a buaibaimi (ral pawl cawlcanghnak) pawl fawitein a thei khotu a si. Longbow Apache hi second 30 chungah ral a tu kho.

Radar nih scan voikhat a tuah le cangka a radar innpi cu ai ong colh ve, cu le cangka ai khar kho colh than. A chungmi an hmanmi computer nih hin target 256 tiang thatein a dothlat khawh. An i tinhmi hmun le hma hmuhfian khawhnak (AN/ASQ-170) siseh, cun pilot nih zaanmui lak i khua an hmuh khawhnak (AN/AAQ-11) siseh, Lockheed Martin nih a sermi an si. AN/ASQ-170 nih cun an i tinhmi hmunhma kawlhawlnak le nanhnehnak dingah direct in khua hmuh khawhnak siseh, video zeih khawhnak thilri ai ngeih hna.

AN/AAQ-11 hi AN/ASQ-170 cunglei zawn te ah a um i, ai mer khomi a si. AN/AAQ-11 nih hman a thlakmi pawl cu pilot siseh, a bawmtu siseh, cun meithal a tlaitu nih ai khuhmi a lukhuh a hmailei ah screen in a langhter i khua a hmuhter hna.AH-64 Apache nih thattein target an kah khawhnak dingah le zaanmui lak zongah khua an hmuh fian khawhnak hnga Lockheed Martin nih tharchuahnak tuah ai tim rih. Cu system thar cu Arrowhead, tiin an auh i, voikhat zoh ah hmun 3 a zoh khomi seh, CCD TV camera, electronic zoom, target pawl an hnung zuldawi khotu seh le a muih tikah auto tein a ceumi khuazoh khawhnak seh pawl ser an i tim.

2003 December ah khan Arrowhead cu ser an thok i, 2005 May ah khan avoikhatnak US Army kut ah an kuat. 2005 June ah khan Arrowhead system cu Apache ah a hmasabik an bunh a si. 2008 ah khan Apache 500nak an kuat a si cang i, a ni thla an tuk ning tein a dang taangmi pawl zong an kuat hna. US Army nih an helicopter run pawl ah Arrowhead system pawl bunh viar dingin timhtuahnak an ngei than.2005 May ah khan UK AH Mk1 ah Arrowhead bunh ve dingin hnatlaknak an tuah. Arrowhead an bunhmi AH Mk1 pahnih cu 2008 November ah khan an kuat hna i, 2010 in cu a dih lakin an kuat khawh hna.

Apache AH-64A/D countermeasures: Apache helicopter ah hin a tanglei raltuknak he ai pehtlaimi electronic thilri hi an bunh hna: Ralrinak a pekmi a tlaitu radar AN-APR-39A(V) cu Northrop Crumman le Lockheed Martin sinin a ra. Lockheed Martin sermi target i ngiat khawhnak system a si mi AN/APR-48A Radar Frequency Interferometer Electronic Support; BAE Systems IEWS sinin ral pawl hun lehrulh khawh colhnak hriamnaam AN/ALQ-144; cun, Goodrich sinin ralrinpekmi a thei/cohlangtu AN/AVR-2 laser; cun ITT sinin ral pawl an radar a hrawk khotu AN/ALQ-136(V) radar jammer an bunh hna.

US Army AH-64D Apache Longbow ah hin ITT AN/ALQ-211 SIRCM pawl bunh an timh. Asinain, cu bantuk hriamnaam tha bunh nak ding phaisa tlamtling in an i ngeih le ngeih lai lo belte a fiang lo. UK AH mk1 ah cun BAE systems an bunh i, Kuwait le Greece zong nih cu bantuk te cu an i thim ve. BAE Systems ah cun ralrinpekmi a tlai khotu Sky Guardian 2000 radar ai tel i, cu radar cu 2003 July ah khan AH mk1 ah an bunh khawh.Israel nih an cawkmi AH-64D ah cun ral pawl kahmi missile kong ralrin a petu SPS-65 le ral pawl radar a hrawk khotu SPJ-40 an i telchih nak ELisra Seraph self-protection system an bunh. Dutch nih an cawkmi AH-64D ah cun Nrothrop Grumman nih an chuahmi ral pawl hun leh khawhnak system an bunh.

Apache attack helicopter engines: Apache ah hin turboshaft engine 2 an bunh i, engine pakhat cio ah hin 1,265kW thaa an ngei veve. American AH-64D nih cun General Electric T700-GE-701 engines a ngei i, UK Apache nih cun Rolls-Royce/Turbomeca nih an sermi RTM322 engines ai ngeih ve. AH-64 Apache a hmual: Boeing AH-64 Apache hi 889m/minute rate in cunglei ah a zuang kho. A phei zawng i a zuan i a cahbik hi 279 km/h tluk cak in a zuang kho. 1,900km tiang khual a tlawng kho. Voikhat a zuan ah hin suimilaam 3 le minute 9 tiang cungah a zuang kho. A khingrih hi 5,165kg hrawng a si i, cunglei kai a thawh i a khingrih belte cu 10,433kg tluk in a vung rit ve. Catialtu: Chelseabawi.

Be the first to comment

Leave a Reply

Your email address will not be published.


*