KNU NIH AN RALBAWI PAHNIH DAN AN TAT HNA, MIPI AN LUNGTLING LO

Minung 25 an thih ruangah KNU nih an kuttang ah a ummi KNDO ralbawi pahnih hna cu dantatnak an pek hna. Karen Ramkulh Wailay myone Kane Lay khua ah minung 25 an nunnak aliam ruangah ralbawi Saw Nedar Mya le Saw Bwar cu ralbawi an sinak rian in dinhter chung an si. Minung 25 thihnak kongah KNDO le ralkap puh an si hna.

KNU nih dottletnak an tuah hnu ah an ralbawi pahnih hna cu atu bantukin dantatnak an pek hna hi a si. KNU nih a tubantuk in ralbawi pahnih dantatnak an tuahmi kongah mipi ruahning aa khat lo ngai ti a si. Zeiruangah ti a si ahcun minung 25 a thimi hna hi KNDO umnak pawngah a thlithup in an cawlcangh lengmang ruangah KNDO nih an tlaih hna.

I, ralkap lei ah thawngpang an pek hna caah kan thahmi a si. Thah loin zoh sawhsawh hna usihlaw kan umnak an theihtuk ruangah kanmah lila zong kan ci a mit dih kho. Tthekhat le bang cu kanmah thahmi an si lo ralhrang kawlralkap hna nih bomb an thlak lio ah a thimi zong an i tel hna tiah KNDO ralbawi dantatnak a tuarmi Saw Bwar nih a chim ve.

Sihmanhsehlaw a thimi minung 25 hna hi mipi sawhsawh hlei a tuahmi an si, KNDO nih an tlaih hnu ah ningcang loin tuk an thah. Dottletnak ttha tein tuah ulaw nan phungning bantukin dantatnak pe hna u tiah ralhrang kawlralkap hna nih KNU cu ca an kuat hna. Cu cakuat bantukin KNU nih thil an tuahmi hi cu a phung asilo tiah sual an phawt ve hna.

An ti tthan rihmi hna cu minung tamtuk a thatmi ralhrang kawlralkap pawl hi tah an mah le anmah dantatnak an i pe ve maw tiah biahalnak zong an tuah hna. KNU kuttang ah a ummi KNDO umnak pawngah hlei a tuahmi minung 47 hna cu a liamcia june ni 13 ah KNDO nih kan umnak an dotthlet tiah an rak tlaih hna i minung 25 an thah hna.

KNDO nih an timi cu hlei atuahmi minung hna hi ralkap lei ah a dirmi lawngte an si tiah an ti hna. Asinain ralhrang kawlralkap lei nih cun mipi sawhsawh an si i, hlei a tuahmi an si tiah an chim ve. Hi thahnak kongah ralhrang le KNDO cu pakhat le pakhat sual an i puh hnu ah KNU nih dotthletnak an tuah i, cuticun dantatnak an pek hna hi a si.

KNU an i hruainak phung ah hin mipi sawhsawh nunnak lak lo ding timi a um i, buainak maw pakhat khat sualnak angei lomi mipi a that mi paoh paoh cu dantatnak pek an si lai timi phung le lam an ngei. Cu an ngeihmi phung le lam bantukin KNU kuttang ah a ummi KNDO ralbawi pahnih hna cu dantatnak an tuah i, ralbawi an sinak an lakpiak hna hi a si.

Be the first to comment

Leave a Reply

Your email address will not be published.


*