TUAR AHAR KO, MOTOR MONG RUANGAH CHINPA RALHRANG NIH AN THAH

Tuluk ram in a rak tlungmi Tazakung khuami Lam Khan Thang kum 29 cu nizan ah an tlaih i, tuni ah a ruak rak la uh tiah chungkhar hna cu an chimh hna. Lam Khan Thang le a hawipa cu ralhrang kawlralkap hna nih nizan ah an tlaih hna. Tuni suimilam pakhat hrawngah a ruak rak la uh tiah chungkhar hna cu ralhrang kawlralkap hna cu an theihter hna.

Thilsining hitihin a si. Tuluk ram ah kum khat hrawng a um i, a rianttuan a tlamtlin lo caah a rak tlung. Mandalay in Kalaymyo panh in motor in an rak ra. Hawi pakhat angei i, an pahnih in Tthohcian khua an phak ah motor mongtu nih a ttumter chung. An motor ah midang minung pahnih an tthu ve. A dongtu pawl an rak phan in Kalaymyo panh cun an rak i thawh hna.

Kalaymyo khuachung luhnak ralhrang kawlralkap hna nih an check hna i, an motor chungah meithal an hmuh. Cu ruangah nizan zingka suimilam hleikhat hrawngah an tlaih hna. Ahota dah a si tiah biahalnak an tuah tikah motor mongtu nih cun anmah ta asi tiah sual a puh hna. Curuangah an tlaih hna. Meithal hi zeizat dah a si timi theih a si lo. An tlaih ti kan theih in kan va kal.

No description available.

Asinain thaizing ah rak ra te uh tiah aa kan ti. Kan va kal tthan tik zongah an umnak thatein aa kan chim duh lo. Palik sakhan le ralhrang kawlralkap sakhan va hal hna uh aa kan ti. Tuni zanlei suimilam pakhat hrawngah cun a ruak rak la uh tiah phone an rak kan chawnh tiah minung pakhat nih a chim. Lam Khan Thang a hawipa zong tutiang an thlah rih lo.

No description available.

A dongtu pawl hna cu an thlah hna nain faktuk in an hrem hna. Motor mongtu le a dang minung pahnih hna hi ralhrang kawlralkap hna nih an tlaih hna le tlaih hna lo theih an si lo. Khoika dah an um timi zong theih an si lo. A nunnak aliammi Lam Khan Thang hi kum nga a simi fapa pakhat le kum ruk a simi fanu pakhat angeimi a si. Aruak cu tuni ah an phum tiah an langhter.

Be the first to comment

Leave a Reply

Your email address will not be published.


*