THANTLANG CDF LE HAKHA CDF NIH NIKHAT AH RALHRANG 27 AN THAH HNA

Thantlang CDF le Hakha CDF nih ralhrang kawlralkap minung 27 an kahthah hna. Nizan June ni 10 ah Thantlang CDF le ralhrang kawlralkap hna cu zinglei suimilam pahra hrawngah Khualhringtlang chungah i kahdohnak a chuak. Cun nizan June Ni 10 thiamthiam ah ralhrang kawlralkap le Hakha CDF hna cu zanlei suimilam pathum hrawngah kahdohnak a chuak.

Hmun hnih i kahdohnak ah ralhrang kawlralkap lei in minung 27 an nunnak a liam. Thantlang CDF le ralhrang kawlralkap i kahdohnak ah ralhrang kawlralkap lei in minung 17 an nunnak a liam i, a nunnak a liammi chungah ralhrang kawlralkap bawi pakhat Bokyi zong aa tel. Thantlang CDF lei in a nunnak liammi le hliam a tuarmi an um lo tiah Thantlang CDF hna nih thawng thanhnak an tuah.

Cun nizan June ni 10 tthiamtthiam ah Ralhrang kawlralkap hna le Hakha CDF hna cu zanlei suimilam pathum hrawng ah Hakha le Gangaw karlak ah i tukdoh kahnak a chuak i, Ralhrang kawlralkap lei in minung 10 an nunnak a liam tiah Hakha CDF lei nih thanhnak an tuah. I kahdohnak ah Hakha CDF lei in hliam a tuarmi le nunnak aliammi an um lo tiah tiah an langhter chih.

May be an image of text that says "CDF"

Thawngpang Dang: Tuni Vanlong tlaknak ah a nunnak aliammi chungah Shwe Phu Company ngeitu hna nupa le an fapa pakhat an i tel. Ralkap vanlawng a tlak ruangah a thimi hna lak ah Pyin Oo Lwin ah sak ding a simi phungkicawng saknak ding caah a hlutu a simi Shwe Phu company ngeitu U Mya Phu te nupa le an fapa Maung Khant Win zong an I tel ve tiah theih asi.

Cun An fahniang fa a si mi Maung Paing Bone Pyae tu cu a lu ah a khawng tiah theih asi. U Mya Phu cu Kawlram cozah nih kawl biaknak lei ah a hlu peng mi pawl an pek tawn mi hna boih zong a rak hmu bal mi asi. Shwe Phu company cu U Thein Sein chan lio tein Karen ram ah sui co mi rian a rak tuanmi company an si. U Mya Phu cu 2013 October ni 14 ah Yangon ah a ummi Trader Hotel le Western Park Ruby rawldawr ah a cang mi bomb puahnak kongah a pehtlai ve mi asi kho tiah palik lei nih taza an rak cuai bal mi asi.

Tangka lak in bomb a rak puahtu a simi Saw Mya Aung cu U Mya Phu inn ah a rak tlun caah hi tiin lunghrinh a rak ton nak hi asi. 2015 ah Saw Mya Aung cu taza zung nih kum 25 thongthlak dingin bia an rak chah I U Mya Phu le a mawtaw mawng Ko Zaw Lat Maung tucu sualnak an ngeilo tiah an rak thlah than hna.

U Mya Phu le a nupi Daw Leh Leh Win hna nih fapa 3 an ngeih hna I an fapa minung 2 hna cu vanlawng cung ah an I tal ve. Vanlawng aa cit mi minung 14 lak ah minung 12 an thi I Maung Paing Bung Pyae le tat-ciat-ci Kaung San Win tu cu an lu ah an I khong I ralkap siizung ah thlop lio an si tiah theih asi.

Be the first to comment

Leave a Reply

Your email address will not be published.


*