Thailand Ram Siangpahrang Nih A Chuahni Lawmhnak Ah Thongtla Singkhat Leng Luat Nak A pek Hna

Thailand ram Siangpahrang Maha Vajiralongkorn nih kum 70 a tlincam lawmhnak ah le a nu kum 90 tlin lawmhnak ah thongtla singkhat leng luatnak a pek hna, tiah theih a si. Siangpahrang pa kum 70 a tlin ni cu July 28 kha a si i, a nu kum 90 tlin ni cu August 12 ah khan a si. Luatnak pekmi dihlak cu minung 103,613 an si.

Tutan luatnak pekmi hna cu, cu hlan nakin an tlawm deuh. Siangpahrang pa chuahni tlin hlan deuh ah Sualtuahnak case atu le tu a chuah/can caah luatnak pekmi kan tlawmter deuh, tiah thongbawi pakhat nih a chim. Luatnak pekmi chung ah Biaceih zung nih bia a ceih cang mi hna, a thongtlak kum cheuthum cheukhat hmanh a thla rih lo mi hna le kum 8 renglo thongthla cangmi hna zong an i tel, a bik in thongchung ah nawl a zulmi hna le chimh a ngai mi hna an i tel, tiah theih a si.

Mithat case in thihdan pek mi Myanmar mi Zaw Lin le Win Zaw zong nikum siangpahrang chuahcam ah thihdan in thih hlan lo thong ah an rak ngaihthiam hna i an thongtlaknak kum 8 a tlin rih lo caah tutan luatnak pek mi ah hin an nih caah cun santlaihnak a ngei rih lo. Crd; The Chin Post

Be the first to comment

Leave a Reply

Your email address will not be published.


*