RIANRANG THAWNGTHANHNAK, SHARE CIO USIH ZAHNAK TLANG..

Rianrang Thawngthanhnak. Thantlang lei in raalzaam pawl Zahnaktlang chung luhnak kong ah Sihhmuh, Thangzang, Fungkah, Saikah, Ruabuk le Ruakhua hi nihin September 11 caah luhnak kan onh. Hi khua 7 pin khua dang cu raaldohnak rian cawlcangh lio a si caah van kan ruatthiam hram rih u. A ran khawh chung in kan van tuaktan lai.

Biakilh: 1. Cu hlan cu Tlang chung luhnak kong ah kanmah Zahnak Battalion nih bia kan chah tawn ko nain atu cu kan cunglei CNA le CDF Thantlang he rian Kan tuan lio a si caah anmah he nawl chuah mi ning in khua kan khan mi a si. 2. Cun atu khua sarih caah Sihhmuh quarantine thil a ni (3) a tling mi rak laak khawh a si. A ran khawh chung le a si khawh chung in rammi nan himnak caah rian tuan khawh kan I zuam lai.Zahnak Battalion. Laknak Salai Unity Fb

Thawngpang dang: Lungler sakhan kah ruang ah a zaam mi hna Mizoram Cherhlun le Ngharchhip khua nih an va don hna. 2021 September 10 Thantlang Peng, Zahnak tlang Lungler sakhan kah ruang ah khua chuah takin himnak lei ah a zaam mi hna cu Mizoram, Cherhlun le Ngharchhip khuami hna nih nihin September 11 ah an va don hna tiah thawng kan theih.

Atu an va don mi hna hi a tam deuh cu Lungler khuami le pawngkam khuami hna an si. Hi kong he pehtlain Thingsai khuasa T Zosangpui nih, “Lungler sakhan kah ruang ah a zaam mi hna hi Cherhlun le Ngharchhip khua mi hna nih tlangrian hrihhawh in an va don hna. Khuachung i motor a um mi poh kal in an umnak hmun tiang an va don hna,” tiah a chim.

Hi ralzaam hna ca ah zeitindah khuami nih an tawlrel lai i an zohkhenh hna lai ti thawngfiang a um rih lo. Lungler sakhan kahnak ah CNA/CDF lei in a thimi an um lo nain minung 7 hliam an tuar tiah i SAC mithat phu lei zong tam ngai an thi tiah kan theih. Myanmar ram uknak hramhram in Min Aung Hlaing nih a laak hnu Mizoram ah a zaam mi hi nihin tiang minung 1000 fai an si cang. Hi chung ah CM hlun Salai Lian Luai telh in MP minung 20 leeng an si cang tiah kan theih. Credit: The Hakha Post.

Be the first to comment

Leave a Reply

Your email address will not be published.


*