RAM LE MIPHUN CAAH CDF PASALTTHA PATHUM NIH NUNNAK AN PEK TTHAN EE

RIP. Chin pasaltha Mindat CDF lei in minung pathum nih ram le miphun caah mual aa kan liamtaak tthan. Chin ramkulh Mindat peng chungah ralhrang kawlralkap le Mindat CDF hna cu July ni 20 thok in biatak tein an i kap tthan i, Nizan tiang kahdohnak an tuah. Tutan kahdohnak ah Mindat CDF pasaltha pathum nih ram le miphun caah nunnak an pek tthan.

July ni 22 kahdohnak ah Mindat CDF chungin Salai Hone Om nih ram le miphun caah mual arak kan liamtak i, July ni 23 kahdohnak ah Pu Chai Thang nih ram le miphun caah a nunnak apek tthan. Nizan a hnu bik an i kahdohnak ah Mindat CDF lei in pasalttha pakhat nih ram le miphun caah a nunnak apek tthan. Tutan kahdohnak ah CDF pasaltha pathum an nunnak aliam.

Tutan i kahdohnak kongah Media tthenkhat nih an langhterning ahcun ralhrang kawlralkap hi minung 20 renglo hna cu CDF lei nih an kahthah hna tiah an chim. Asinain hi konghe pehtlaiin ralhrang kawlralkap pawl a nunnak a liammi siseh, hliam a tuarmi kong siseh pakhat hmanh Mindat CDF lei nih an thanhmi a um rih lo. Ralkap lei hi a thimi cu an tam tuk tiah theih asi.

Ralhrang hna nih uknak an lak hnu ah Mindat CDF le ralhrang kawlralkap i kahdohnak ah hin Mindat CDF lei in ram le miphun caah nunnak ape cang mi hi minung 27 an si. Tuan deuh an rak i kahnak ah Mindat CDF lei nih ralhrang kawlralkap hi minung 200 renglo an rak thah cang hna ti asi. Tutan ah a thimi zat tu hi theih asi rih lo.

Thawngpang dang:Taluk cozah nih an ram ah Myanmar lei in covid zawtnak a karhmi a luh lonak dingah tiin Taluk-Myammar ramri ah hmunhma a khuarmi KIA sinah covid khamnak sii thonghra (10000) a bawmh hna tiah theih a si.Kan theih cio bantukin Myanmar cu nikhat hnu nikhat in covid zawtnak a karh chin lengmang. A thimi zong an tam chin lengmang. Siibawi le siizung lei riantuantu tampi CDM ah an luh caah siizung ah zohkhenhtu an um huaha ti lo.

Khatlei in ralhrang nih mipi zohkhenhnak tha tein an tuah lo piin hnahnawhnak an tuah lengmang fawn. Atu bantukin dirhmun ah Taluk sinah bawmhnak kan hal i ramri ah a ummi Yunan peng nawlngeitu hna sin in KIA bawmhnak an kan pekmi a si tiah KIA lei in chimnak nawlngeitu Bohmuci Naw Bo nih AFP ah a chim. Hi covid khamnak sii 10000 chungah cheukhat cu tangka pek in cawkmi a si i tam deuh cu a bawmh in bawmhmi a si tiah Bohmuci Naw Bo nih cun a chim.

Taluk cozah nih a thanhning ah Taluk ramchung dihlak ah covid zawtnak aa chawnh tharmi 57 an si. Mining 57 chungah 15 cu Myanmar ramri khua a simi Shweli ah a ummi an si i 1 chungah 12 hi Myanmar rammi an si tiah theih a si. A liamca cawn nili ni ah Taluk nih ralhrang bu sin covid khamnak sii an bawmhmi 736,000 cu Rangon a phan cang. Hi zong hi Taluk-Myanmar ramri ah a ummi hna kha papek in an chunh hna lai tiah theih a si.

A sullam cu Taluk nih ralhrang bu sinah siseh KIA sinah siseh covid khamnak sii bawmhnak a pekmi cu Myanmar rammi hna an zawnruah caah si loin Myanmar in Taluk nih covid zawtnak thar a luh chinchin lonak dingah a si. Covid a chuahnak Taluk nih an ram ah covid a luh ding an phang tuk tinak a si cu! Credit: The Chin Post.

Be the first to comment

Leave a Reply

Your email address will not be published.


*