KHUACHUNG AH RALKAP BOMB KAMH MI NIH PU LING SUI A PUAH HNAWH

Chin Ramkulh Kanpetlet ah SAC ralkap nih an hmanh/do mi bomb cu U Ling Sui (Rtd.Police) nih August 23 ah aa lamhsual i a ke an tanpiak tiah theih a si.Kanpetlet Semankone Sang Aungyatana pura pawng ah umhmunkhuar mi SAC ralkap nih an do mi bomb a si i U Ling Sui hi Palek pension thlahlawh a va chuah i inn a tinlei ah bomb aa lamh hi a si.

Pension thlahlawh a va chuah i inn a tin ah hin motor lampi in kal law tiah pawngkam nih an chimh ko. Nain a umkal tawnnak lam penpawk (Lai lam) in a kal i bomb aa lamhsual hi a si. Sang chung rumro bomb do le chiah hi cu a si te a si lo,” tiah khuami nih an chim.U Ling Sui cu cuka hrawng SAC ralkap sii lei thiam mi le Kanpetlet RedCross nih an zohkhenh hnu ah Pakokku sii-inn ah an kalpi tiah theih a si. Credit: The Hakha Times

Thawngpang Dang: Ralhrangbu he ralkap cawlcanghnak le thiamnak lei ah tuantinak thanchonak tuah dingin timhcia kan si tiah Russia deputy defence minister Alexander Vasilyevich Fomin nih ralhrangbu Army, Air force le Navy coordinator bochokkyi Maung Maung Aye he nizaan August 23 an i tonnak ah a chim. Russia deputy minister of defence nih Kawlram cu Asia-pacific le South-east Asia ah zumh awktlak mi kan hawikom ram a si.

Lung a that ter lo ngai mi pakhat cu Kawlram ramkhel kong hi a chia ngai.Asinain, ramchung remdaihnak caah hruaitu hna nih a si khawh chungin an i zuam lio a si ti kan theih. Ralkap cawlcanghnak le thiamnak lei in Russia-Myanmar ram pahnih pehtlaihnak a feh chinchin nak dingah kan tuah lai tiah a ti. Mah tonbiaruahnak hi a hlan bantukin tlamtling ngai in ngeih a si i,

Russia le ralhrangbu defence minister kar ah a lamkip in tuantinak thancho ter dingin biakamnak cu fehter than a si tiah Russia defence ministry thawngthanhnak nih a chim. Bochohkyi Maung Maung Aye le a hawi le hna hi Russia ah tuah lio mi International Army Games zuamnak Russia, Moscow ah an um lio a si. Kan hnu June thla ah ralhrangbu hruaitu Min Aung Hlaing cu Russia ram ah zarhkhat chung cam in a kal.

Zarhkhat a cam chungah meithal le ralkap mawtaw hna sernak hmun Rosoboronexport Company tuanvo ngeitu hna he thiamnak lei ah i bawmhchanh khawhnak kong an i ruah tiah ralhrangbu thawngthanhnak website nih a tial.Min Aung Hlaing Russia a tlawn hi uknak a lak hnu a voi 2 nak ramleng a tlawnnak a si i, ram pakhat hruaitu dirhmun in a tlawng mi a si nain, Russia president he cun an i tong kho lo tiah theih a si. TCP

Be the first to comment

Leave a Reply

Your email address will not be published.


*