KALAYMYO AH ZAWTNAK NGEIMI MINUNG 40 RENGLO AN ZAAM

Kalaymyo i kahnak ruangah covid zawtnak angeimi minung 40 renglo an zam. Ralhrang kawlralkap le Kalay PDF pawl Kalaymyo Thlanglei i kahnak ruangah khuachung ah a ummi mipi hna cu khua an chuahtaak. Khua a chuahtaak mi chungah zawtnak angeimi minung 40 renglo an i tel hna. Atu tiang zong ramtangah an um tiah theih asi.

Kalaymyo thlanglei ah a ummi khua le pawngkam hrawngah aliamcia July 15 thok in ralhrang kawlralkap le Kalay PDF an i kah hnu ah ralhrang kawlralkap hna cu an chuaklut lengmang. Curuangah Tinta khua le အရှေ့စည်း khua i, covid center pahnih ah zohkhanh cuahmah mi minung 40 renglo hna cu khuachung mipi azammi hna sin ah ramtang ah an zam ve tiah khuami pakhat nih a chim.

Tinta khua le အရှေ့စည်း khua pawngkam ah PDF pawl an um. July ni 15 ah ralhrang kawlralkap le PDF hna cu nithum chung biatak tein i kahnak a chuak. Ralhrang kawlralkap hna nih hriamnam nganngan in an kah hna i, khuachung inn zong zeimawzat a rawk hna. Hi i kahnak ruangah khuami mipi 400o renglo hna cu an zam tiah theih a si.

Hi a zaami chungah covid zawtnak angeimi minung 40 renglo an i tel hna. Tinta khua ah zawtnak ruangah minung 20 hi thlahnih chungah an nunnak aliam cang. Covid center ah zohkhanhtu rian a ttuanmi hna zong ralhrang kawlralkap ttih ruangah an zam ve hna tiah theih a si. Naite ah khan minung 60 an test hna i cu chungah minung 30 renglo zawtnak an ngei.

Thawngpang dang:Yangon Thlaan Pakhat ah Ni Khat ah Ruak 500 Dengmang an Phan. Nizaan (July 22) ah Yangon ramtthen, North Okkalapa ah a ummi Yayway thlaanhmun ah mithi ruak 500 dengmang an phan, tiah mibawmtu pawl nih an chim.Zaanlei sml. 6:00 fai tiang ah mei in an khangh cangmi miruak 400 leng a si i, zaantlai hnu an khanghmi pawl he tuak ah cun 500 dengmang an si, tiah mibawmtu hna nih DVB ah an chim.

Yangon ramtthen ah mi tam bik nih an i vuinak thlaanhmun hmun 4 an um: Yayway, Hteinpin (Hlaing Thayar), Kyisuh (South Dangon) le Kyuchawng (Shwe Pyi Tha) hna hi an si.Hi thlaanhmun pali lak ah Yayway le Hteinpin thlaanhmu ah hin atulio miruak a phanmi an tam bik.July 13 thawk in a cunglei thlaanhmun pali ah hin ni khat ah miruak 600 in 700 karlak an vui hna.

July 20 a hun phak tik ah COVID-19 in an thimi an karh chinchin i, thlaanhmun pali ah miruak 1,200 cung an phan lai, tiah zatlang mibawmtu pawl nih an tuaktaan.“Oxygen i hmuh khawh lo ruang ah a thimi an tam tuk lawmmam,” tiah mibawmtu hna nih an chim. July 22, ni khat chung lawnglawng ah hin Yangon ramtthen thlaanhmun pali ah miruak 1,300 hrawng an phan lai tiah an zumh.SAC ngandamnak vuanci zung nih thawng a thanhmi le atak thil sining aa thlau tuk, tiah mibawmtu pawl nih an langhter. Credit:The Chin Journal

Thawngpang dang:Falam Peng Khuate Inn pawl ah SAC Ralhrang nih Thilri an Fir. July 20 ah CNDF le SAC ralhrang karlak kahdohnak a chuak i Falam peng khuate pali in inndawng 200 hrawng nih an khua an zaamtak.Khuami nih an zaamtakmi Thlanrawn, Taal, Tlangzar le Zamual khua ah SAC ralhrang pawl an lut i inn kutka an bauh, thiri an fir i mortorcycle pawl zong an hrawh hna.

Khuami pakhat nih, “A firmi thilri fihlak cu kan thei ve lo. Puan pawl an lakmi cu kan hmuh. Nizaan ah khua ah munung pathum an kal i SAC ralhrang nih an phone an chuh dih hna. An tlai hna lo, an thlah tthan hna,” tiah a chim.July 20 kahdohnak kong he pehtlai in CNDF lei nih thawngpang an chuahmi a um rih lo.

Be the first to comment

Leave a Reply

Your email address will not be published.


*