CDF-MINDAT NIH RALHRANG KAWLRALKAP AN HRIAL CHUNG HNA

SAC Ralkap nih Mindat Mipi Ralkhamnak ah an Hman hna caah CDF-Mindat nih an Hrial Chung Hna. Nihin zinglei sml. 7:00 hrawng in zaanlei sml. sml. 3:00 tiang SAC ralkap helicopter nih voi 30 hrawng Mindat khuachung ah ralkap le ralhriam pawl a rak chiah hna. Khuachung i SAC ralkap hmunkhuarnak in Mindat khuami hna inn pawl cu 66MM miakpi in pehzul in an kah peng hna.

Kyaukhtuh in motor lam in SAC ralkap pawl an rat khawh ti lo caah helicopter hmang in ralhriam le ralkap pawl an chap thluahmah hi a si.Khuachung i mino 15 an tlaih hna. An tlaihmi hna cu SAC ralkap nih ralkhamnak bantuk in hmai ah an kalter hna i khuachung ah an i chok. CDM a tuahmi zong pa paohpaoh cu an tlaih dih hna,” tiah Mindat mipi uktu bu nih thawngthanhnak ah an langhter.

Khuachung inn pawl ah miakpi in an kah peng caah nu le ngakchia tampi zong ramlak ah an zaam hna. An tlaihmi minung pawl ralkhamnak ah an hman hna caah kan kah hna ahcun kanmah minung pawl kan khen hna lai ti kan phan caah CDF-Mindat nih kan hrial chung hna. Kan rak kir tthan lai i kan doh tthan hna lai,” tiah thawngthanhnak ah an langhter. Credit: The Chin Journal

May be an image of aircraft and nature

Relchih:R2P Van Hai Lo CDF. C-Cawn Bik pa raltha tiah kan rak cawng. Atu ahcun C-CDF pa raltha kan si cang.R2P van kan hai ti lo.A ngaite ti ahcun ram nawl ngeihnak a la tu ralkap he artlang in dirhmi (parallel government) NUG bantuk hi a dik ko zongah international community le UN le ram dang hna nih cozah puitling i pom dingah harsatnak tamtuk a um.

Kawl rallo kap nih khuaika ram hmanh ah hriamnam a cawk khawh lo nak hnga phih khamnak UN nih a tuah khawh ahcun lawmh ngai ding a si.Cu zong cu China le Russia nih veto in an hnawn hoi lai i a fawi lo.Kan i ruahchan khawh bik mi cu NUG hruaitu hna nih hriamnam a kan bawm kho tu le a kan zuarh kho tu hna an lemsawi khawhnak lam a um ahcun mipi kan thazang taktak a si lai.

Hi zong a fawi lai lo.Cu nakin mipi kan thazang taktak cu mipi kan lungthin hi a si.Ral teinak ah a biapi taktak mi cu mipi lungthin lak khawh hi a si. Bianabia ah US nih Afghanistan cu 2001 kum in nihin tiang a tuk i Taliban pawl an lungthin a lak khawh lo caah a tei ti khawh a si hnga lo.Tulio ahcun CDF nih mipi kan lungthin chungah hmunhma an lak mi hrim nih hnarcheu cu teinak kan ngah cang.

CDF nih mipi lungthin a lak i kan lung aa rual chung paoh cu R2P van zong kan hai ti lo hih!Che Guevara bia bang Dothlennak timi cu a hmin tikah amah tein a tla mi Apple bantuk a si lo. Nangmah nih tla lakin na tuah lai a ti bantukin CDF nih R2P hngah zong aa bochan lo.Pa raltha ciammam…nain nangmah le keimah thengte a kan bochan.

CDF caah kan ti khawh ciote kut kan samh hi kan Chin ram caah kanmah le tuanbia cio kan tial bantuk a si. CDF thawngpang nih MAH a thutdan a hninh cang.A thutdan in a thluk caan phan te lai. Cutik ahcun ” Aw, aw” timi le “Ee,ee” timi lawng aa dang te lai.Cu ni ahcun R2P van hai lo CDF cu kan miphun pi nih a sang bik upatnak he kan conglawmh ti te ding ruahcia ahkhin “CDF…lung nan hmui kho tuk. Kan miphun caah nan sunglawi tuk, Bawipa Pathian tu nih in dir pi ko seh tiah thlacam kan in bawmh.Credit: Salai Tin Maung Win

Be the first to comment

Leave a Reply

Your email address will not be published.


*