APOITUK. CHIN MINO MINUNG PANGA HNA CU RALHRANG NIH TAZA AN CUAI HNA

Paletwa Ah Tlaihmi Mino 5 Cu 505(A) In Tazacuai An Si Kan hnu May 28 Paletwa ah bomb voi 2 a puah ruangah an tlaih mi hna chungin mino 5 hna cu rampi hmaichiatter tu tiin pohmah 505(A) in Paletwa biaceihnak zungah tazacuai an si. Hi ni i bomb a puah ruangah mi 20 renglo an tlaih hna i, midang cu an chuah dih cang hna nain hi hna 5 hi Rakhine ram lei ah an hruai hna hnuah nai ah Paletwa ah an rak hruai than mi hna an si.

505(A) in taza an cuai mi hna hi Ko Ai Htun Min (Sanphu company ngeitu), Hlasakthiam Ai Htun Min, Tit-taw riantuan Ko Ai Htun Min, U Ya Kyaw le Ko Aung Htun Soe hna an si. Hi hna panga hi Paletwa biaceih zungah an kong an ceih lio a si tiah theih a si.Anmah kong he pehtlaih in Paletwa peng biaceihbawi nih “bomb puahnak kong he a pehtlaih mi an si hna lo, zumhlonak he lamzawh dingah an lemsoi hna caah le phaisa an khomh ruangah a si” tiah a ti.

Tazacuai mi ah a tel ve mi Phu Company ngeitu Ko Ai Htun pa U Chit Htun nih; bomb puah mi le ka fa hi i pehtlaihnak pakhat hmanh a um lo. Phaisa kuat hna kan tuah caah an zumhlo mi a si. CB bank in ka fa hi phaisa kuatnak a tuah mi a si. mah caah an tlaih, ka fa nih sualnak a ngei lo” tiah a chim.Mino 5 hna hi an tlaih hna hnu ah Paletwa in Sittwe ah an kalpi hna hnu ah July 11 ah Sittwe palik sakhan in Paletwa palik sakhan ah an kuat than hna.

Thawngpang dang relchih: Kawlralkap ralhrang dirkamh dingin buu thar a dirhtu Tin Htun an kahthah. Ralhrang kawlralkap bawmh dingah Wuntharpal timi buu a dirhtu Tin Htun cu nizan zanlei suimilam panga hrawngah meithal in an kah. Tin Htun cu lampi aa chawh lio ah meithal in an kah i, sizung ah an kalpi. An kahnak hliamhma a fahtuk caah sizung ah a nunnak aliam tiah thanhnak an tuah. Tin Htun hi ralhrang kawlralkap biatak tein a dirpitu asi pin ah ralhrang kawlralkap caah cawlcanghnak buthar zong a dirhtu asi tiah an chim.

Hi konghe pehtlaiin minung pakhat nih a chimmi cu Yangon South Dagon ah amah hi ralhrang kawlralkap a dirpi taktak mi a si pin ah ralhrang caah biatak tein cawlcangh dingin Wuntharpal timi buthar a dirh. Ralhrang kawlralkap caah cawlcanghnak tuah ding hi an rian a si bik ko. Nizan zanlei suimilam panga hrawnghrang ah Tin Htun cu lampi aa chawh lio ah meithal in voithum an kah. Akaptu hna cu an zam colh i, pawngkam a ummi midang nih rianrang in sizung an kalpi colh ko nain a nunnak an chanh manh lo i, a nunnak a liam tiah a chim.

Be the first to comment

Leave a Reply

Your email address will not be published.


*