AN UNAU IN RALHRANG MITHI RUAK NIH A ZULH COLH HNA

Ralhrang kawlralkap an mualpho colh, thanhnak an tuah caan hmanh a sau hlan ah miruak nih a zulh colh hna. Ralhrang kawlralkap hna nih NUG siseh CRPH siseh PDF pawl si hna seh ralkap cozah a dohtu pawl hna an cawlcangh ning le an umnak hmun thawng aa kan thanhtu cu laksawng ah tingnga kan in pek hna lai tiah ramchung mipi vialte theih in tlang an zarh.

Cun thawngpang nan thanhmi hoih in laksawng cu tingnga cung zong asi kho tiah an ti rih. Asinain ralhrang kawlralkap lei ah rian a ttuanmi cu an nunnak caah ttihnung taktak mi a si i, thihnak nih a zulh colh hna. Ralhrang nih tutan ah thawngthanhnak an tuah i nikhat hmanh a liam hlan ah Dalan pakhat cu a lu an tan i, lamkam ah a ruak an char.

Sagaing ram Tangse peng Kyatsukan khua ah dalan pakhat cu nizan ah khan alu an tan i, lam kam ah a ruak an char. A ruak in an charmi pa hi ralhrang kawlralkap in aa dinka mi a si. Asinain ralhrang nih buainak ramchung an tuah hnu ah ralkap adohkalh mi konglam vialte ralhrang sin ah thawngpang a pek lengmang hna tiah khuami hna nih cun an chim.

Tutan thihnak konghe pehtlaiin khuami pakhat nih a chimmi cu athimi pa hi U Kyaw Nyunt kum 70 a si i, ralkap rian in aa din cangmi a si. Kan hnu thla ah khan ralhrang kawlralkap sin ah a thlithup in thawngpang a pek lengmang ruangah an rak hro i a rim hlei lo. Cu hnu ah khua in a tlau i, a rak kir tthan nak hi nihnih lawng a si rih ah a ruak in an char hi a si tiah a chim.

Cabia dang: Tutan thawngpang cu a turu kho taktak hih. Ralhrang kawlralkap pawl an bu ning in an thi dih tiah an chim. Shan Ramkulh Mong Ko peng Man Khum le Man Pin karlak ah a cawlcang mi ralhrang kawlralkap bu khat hna cu KIA le MNDAA nih hmunkhat ah an kah hna i, ralbawi pahnih an thih pin ah a dang ralkap bu hna cu an dihlak in an thi dih tiah Kachin Waves nih alanghter.

Hi konghe pehtlaiin kahdohnak pawngah a ummi khuami pakhat nih a chimmi cu ralhrang kawlralkap pawl an kal lio ah KIA le MNDAA nih an bawh hna i, an kahdoh hna. Hi i kahnak ralhrang kawlralkap bawi pathum an si i, pahnih an nunnak aliam, Pakhat tuhi hliamfak tuk a tuar i, helicopter in an rak lak. Adang ralhrang pawl hna cu an dihlak ti awk in an thi dih.

Ralhrang kawlralkap a thimi hi minung zakhat cu an si lai. Aruang cu ralkap bu khat ah hin minung zakhat hi a tlangpi in an si tawn tiah Kachin thawngzamhnak ah a chim. Nizan ah khan KIA le MNDAA an i fonh i, ralhrang kawlralkap hna cu zingka suimilam pariat in pahra tiang an i kap. Cun zanlei suimilam pali in pasarih tiang an i kap hna. Athimi hi fiang tein theih an si rih lo nain ruak tamtuk an lak cang hna, hriamnam tamtuk an chuh rih hna tiah Shan thawngzamhnak nih alanghter chih ve.

Be the first to comment

Leave a Reply

Your email address will not be published.


*