ZUALKO. PASALTTHA JOHAN NIH RAM CAAH A NUNNAK A PEK

Natchaung kahdohnak ah mipi hriamtlai pakhat a nunnak a liam. Kalay peng, Natchaung khua lei in March 8 zinglei ah ralhrang le mipi hriamtlai karlak ah kahdohnak a chuak.Cu kahdohnak ahcun mipi hriamtlai pakhat, Johan Htet Naing Zaw cu ram le miphun caah a nunnak a piak tiah Zalen thawngzamh nih a langhter.

Thawngpang dang. February 27 in March 7 tiangah Chinland Defense Forces le ralhrang karlak ah kahdohnak voi 18 a chuak i ralhrang 80 leng an thi. Mipi hriamtlai lei in minung 4 nih ram caah an nunnnak an pek tiah thawng theih a si. Falam in Hakha lei ah eidin a phormi ralhrang mawtaw 27 le tank 2 cu ralkap thazang 200 hrawng he Hakha lei an panh.

Cu ralhrang mawtaw thluan cu Chin National Front (CNA), Chin National Defense Force (CNDF) le Chin Natinal Defense Force-Hakha (CDF-Hakha) phukomh hna nih voi 15 an kah hna caah ralhrang 70 leng an thi tiah theih a si.Cu zarhkhat chung kahdohnak ahcun, CNA ralkap 3, CNDF hriamtlai pakhat, an zapi te minung 4 nih ram caah an nunnak an pek tiah theih a si.

Cun, Chin ramkulh, Falam peng, No.2 India-Myanmar lam cungah a cawlcangmi ralhrang pawl cu Chin National Army (CNA), Chin National Defense Force (CNDF), People Defense Force-Zoland (PDF-Zoland), Civic Defense Militia (CDM-Syin) le CDF -Hualngoram hna fonh in an kah hna caah ralhrang 8 hrawng an thi. Mipi hriamtlai phu nih hliamhma pu lo tein hnu an kir kho tiah Chin National Front-Headquarters nih March 8 ah cathanh a chuah. Credit: The Chinland Post.

Be the first to comment

Leave a Reply

Your email address will not be published.


*