SURKHUA RC FATHER AMAH TEIN AA PHUANG CANG. BIAFIANG AN LANGHTER

Surkhua RC Father aa phuang cang. Surkhua Pastor le RC Father hi Ralkap he pethlaihnak an ngeih ruang ah kan tlaih mi hna a si tiah CDF-Hakha nih Khonumthung News sin ah an chim. Chin ramkulh, Hakha peng, Surkhua RC Father le Pastor pakhat cu CDF-Hakha nih an tlaih hna i chikhat an hren chung rih hna tiah nizaan in thawng theih cio asi.

Hi kong he pehtlai in Khonumthung News zong nih CDF-Hakha sin ah pehtlaihnak an tuah hnu ah a tu bantuk in thawngpang an hun langhter than hi asi. Surkhua RC Father pa hi Ralkap he pehtlaihnak a ngei mi asi. Cun tutan Hakha a kal zong hi Ralkap nih an auh caah a kal mi a si timi thawngpang kan theih. Cu caah ralhrang he pehtlaihnak a ngei timi ruang ah kan tlaih mi a si.

Kan tlaih i biahal nak zong tha tein kan tuah cang. A mah zong nih Ralkap he pehtlaihnak ka ngei ko tiah fiang tein a chim cang. Cu caah zeitin hmanh in kan tuah lai lo, humhimnak kan ruah caah chikhat kan hren chung mi a si ko tiah CDF-Hakha nih an chim hi a si. Surkhua ah a um mi Police Sakhan cu CDF-Hakha nih May 8 ah an rak lak.

Cu hnu ah Ralkap pawl an rak kai tthan i May 31 le June 1, 2021 ah fak ngai in CDF-Hakha le Ralkap pawl an i kap than. Cu raldohnak ruang ah Surkhua telh in, pawngkam khua 10 leng nih khua an zam tak. Midang khuami an rak zam dih lio ah RC Father hi cu a rak zam lo, khua ah a rak um ko i cu ahcun Ralkap pawl he pehtlaihnak a ngeih hi a si tiah CDF-Hakha nih cun an langhter. Source: Khonumthung News

Hi konghe pehtlaiin William HC nih atialmi cu: Halkha peng Surkhua Siangbawi (Father) Hrang Tin Thang le an krihfabu damah saya (Catechist) hna cu, Halkha CDF nih an tlaih,hren lio hna si tiah theih si.Father pa hi Halkha peng Dongva khuachuak a si.Damah sayapa kong bel fiangin ka theih lo caah ka ttial lonak si. Kanram democracy tling hmuhnak dingah a sikhawh tawk in a umnak peng le khuaah a rak i zuam bal ve mi si tiah amah naihniam mi sinin theih a si lio SAC ralhrang he pehtlaihnak nan ngei tiah tiin Halkha CDF nih an tlaih le an hrennak hna hi ni 3 a si cang tiah media ah hmuh asi..

Mah RC Siangbawi (Father) hi Surkhua i an krihfabuu Damah Saya pa he tiah Halkha an tlawng i Halkha khua an phak lai te ah CDF nih an tlaih hna tiah theih asi.Halkha CDF nih hin hrem,tukvelh ding phunin tlaihmi siloin Kawl ralkap he nan i chawn,pehtlai tiah thawng kan theih caah adik maw dik lo timi kongah,halnak tuah dingah tlaih le hrenmi an si tiah theih asi.Halkha CDF nih Siangbawi le Damah sayapa an tlaihmi hna hi,felfai le remte in hmunhim ah an chiah,umter ko hna tiah theihchap mi si. Kaphnih in(cathanh) statement a chuah hnu lawngah biafiang a lang te lai.Mah hlanah cun biafiang a lang kho rih lai lo. Comment dawh lo pek loding si lai.

Be the first to comment

Leave a Reply

Your email address will not be published.


*