Matupi Ah SAC Ralkap Nih An Mah Duh Ning Poh In Datsi An Zuar Ter Hna

Chin ramkulh, Matupi khua cu a luancia caan ah SAC ralkap nih phun tampi phihkhamnak an rak tuah caah ei awk, din awk zong tualchung mi nih caan saupi an rak hmu lo. Atu lio cu Matupi- Mindat kar kahdohnak a um ti lo caah a hlan nakin eidin thili ri a lutchuak kho deuh cang, tiah theih a si. Matupi ah eidin thilri cu a dih lo nain thil man a kai tuk. Asinain, datsi zuarnak kong ah SAC ralkap nih an duh ning in an zuarter hna caah datsi zuarmi hna cu an sung ngaingai, tiah tualchung mi pakhat nih a chim.

“Matupi khua ah datsi a zuarmi hna hi Pakokku ah an laakmi a si. Datsi tank pung 3 an cah ahcun pung 1 hi a hmun ah laak ning zat in SAC ralkap kan pek hna. Cheuthum cheukhat hi kan laak ning zat in kan pek hna, kan sung tuk ko nain anmah nih hramhram in nan laak ning zat in nan kan pek lai an ti,” tiah datsi zuartu pakhat nih a chim. SAC ralkap nih datsi an cawkmi cu an zuar ṭhan ti lo i, anmah ca ah an i chiah. Matupi khua ah datsi thawl khat(1 liter) ah kyats 4000 a phan, tiah theih a si.

Thawngdang – SAC ralkap nih an khangh i an hrawh dih cang mi Thantlang khua cu a thar in sersiam ti loin, India le Thantlang ramri Dawn khua ah ṭhial ding in SAC ramkulh cozah nih timhtuahnak a rak ngei, tiah Mizzima nih a ṭial. Thantlang ṭhial an timhnak hmun, Dawn khua cu India le Myanmar ramri Tio tiva kam ah a ummi khua pakhat a si i, inn 250 hrawng umnak khua a si. “A luancia June 30 ah khan Chin ramkulh cozah nih Thantlang khua remh le sersiam ṭhannak ding kong ah tonbiaruahnak an rak ngei. A rawkmi Thantlang khua cu sersiam ti loin, hmundang ah ṭhial ding in a rem hnga maw, tiah ramkulh cozah nih rampi(Union) cozah sin ah halnak a tuah.

An chim ning ah cun ramri zong a si caah India he i pehtonhnak ah a ṭha, tiah an langhter nain, rampi cozah nih lungtlinpi lonak cakuat a leh hna,” tiah min langhter duh lo mi pakhat nih a chim. Thangtlang um SAC ralkap hna nih Thantlang khua cu voi 35 tiang an duah caah, Thantlang khuachung inn a thong leng a kang i, mipi dihlak cu India ram le ramri lei ah ralhrial in an um hna. Crd; The Chin Post

Be the first to comment

Leave a Reply

Your email address will not be published.


*