India-Myanmar Ramri Ṭio Tiva Ah Ralzaam Ngakchia Pakhat A Paam

India-Myanmar ramri Mizoram ramkulh, Zokhuathar khua ummi Myanmar ralzaam kum 13 ngakchia pa pakhat cu Ṭio tiva ah nihin August 14, zinglei ah a paam, tiah theih a si. Ti ah a paam mi ngakchia pa cu Kalay peng Satkanth(စက္ကန့်) khua mi David Lal Hruai Zel a si i, nihin zaanlei suimilam 3:00 ah Zokhuathar ah a ruak vuinak an tuah, tiah theih a si. SAC ralkap nih Kalay peng Satkanth(စက္ကန့်) khua cu voi tam ngai hriamngan in an kah caah, tualchung mi hna cu Kalaymyo le Mizoram lei ah ral an zaam hna, tiah theih a si.

Thawngdang – Sagaing ramṭhen, Taze peng Inkokka(အင်္ကုက္ကား) khua nichuahlei pyusawhti sakhan cu PDF nih drone in bomb an thlakhnawh hna i, Taze PDF phufonh nih an kah chap hna caah pyusawhṭi 7 an thi i, hliamhma tuar zong an tam, tiah Taze PDF nih an thanh. Nihin August 14, zinglei suimilam 8:45 ah drone in bomb thlakhnawh a tongmi pyusawhti hna cu an zaam i, cu a zaam mi hna cu Taze PDF battalion 6, Taze pah-kah-phah le Guerrilla Warfare – KPK phu hna nih an kah hna. Kahdohnak ah cun pyusawhti 7 an thi i, hliamhma tuar zong an tam. Pyusawhti hriamngan hmanmi nih PDF chungtel 2 a hliamh hna i, an hlaimhma kong ah thinphan ding a um lo, tiah Taze PDF nih an chim.

Cu bantuk in, nihin August 14, zaanlei suimilam 4:50 ah Magway ramṭhen, Myine le Poah tualchung hriamtlai phufonh nih Myine thlanglei ah rallam sialtu SAC ralkap hna cu Pauk peng, Kantit(ကန်သစ်) khua le Htanppauk(ထန်းပေါက်) khua kar ah bomb lung 11 an puahhnawh hna caah SAC ralkap 4 an thi i, 2 hliamhma an tuar, tiah Myine tualchung hriamtlai phu hna nih an thanh. A luancia July 26 lio ah Magway ramṭhen, Myine peng nichuahlei ah rallam a rak sialtu SAC ralkap 75 hrawng cu Reaper Column hriamtlai phu nih an kahdoh hna caah SAC ralkap 7 hrawng an thi i, hliamhma tuar zong an rak tam ngai, tiah tualchung hriamtlai phu nih an thanh. Crd; The Chin Post

Be the first to comment

Leave a Reply

Your email address will not be published.


*