CNA CAMP PAWNG SOPUM KHUA AH RALHRANG 100 AN PHAN

Sopum ah SAC Ralhrang 100 Hrawng an Phan, Khuami Cheuthum-Cheuhnih an Zaam. Nihin zaanlei sml. 3:00 hrawng ah Thanthlang peng, Sopum khua ah SAC ralhrang 100 hrawng an phan i khuami cheuthum-cheuhnih an zaam, tiah thawng kan theih. Khua upa pakhat nih, An rak phan lai timi thawngpang kan theih cia i pa upa deuh lawng khua ah an taang.

A dang cu an zaam dih. Kan zapi zaam cu kan inn an bauh dih lai ti kan phan caah cheuthum-cheukhat cu khua hngah pah in an taang ko,” tiah The Chin Journal ah a chim. SAC ralhrang pawl Sopum khua an luh lai ah meithal zun 10 hrawng pehzul in an puah. Khua an luh hnu ah khuachung ah a taangmi khua upa le pastorte cu SAC ralhrang bawi nih a ton hna i biaruahnak a ngeih hna.

Tonnak aa telmi khua upa pakhat nih, “Zeihmanh nan thinphang hlah u a kan ti. Nan sattil pawl zong a herh a si ahcun nanmah nih nan khiahmi a man ning tein kan in cawk ko hna lai an ti. Buaibainak chuahpi awk ah kan ra lo a kan ti. Cun, meithal i ken buin ahohmanh i chok hlah u, ral ah kan i ruah hna lai i kah sual a um kho a kan ti,” tiah a chim.

SAC ralhrang pawl cu Sopum ah tu zaan riah an i tim. Zei tik tiang an caam lai theih a si lo. Sopum cu Thantlang he meng 12 hrawng a hlatnak ah a ummi a si i, ahlan ah a rak ummi SAC ralhrang minung 17 hrawng cu kan hnu thla ah khan Thanthlang lei ah an rak kir. A um ciami pawl an kir hnu ah thazaang tampi in nihin an rak phak tthan hi a si.

Thantlang Le Sopum Khua Kar Ah Tlangte Khuami A Ruak In An Char -

Relchih: Hakha ah SAC Ralhrang nih “Lehrul Cham Ding” an timi hna Mincazin an Tar. Hakha khuachung Electric tung pawl ah SAC ralhrang nih “Nat-Soe-Kyi-Mya Bu” timi min hmang in lehrul cham ding tiah an i selmi hna mincazin nizaan ah an tar hna. Minung 19 min an tar hna i Hluttaw Chairman Pu Zo Bawi telh in NLD palai cheukhat zong an i tel hna.

Cun, taza an cuaimi hna Salai Ngun San Aung le Salai Elishama telh in CDM ah aa telmi ngandamnak lei rianttuantu hna le cachimtu sayama zong an i tel hna. Mincazin an tarmi chung ah Ngun Uk Thang le Bawi Lian Hup cu kan hnu thla ah an rak tlaih hna i, atu tiang an thlah rih hna lo. A tanglei tlerhkhawnnak ca a tartu ah “Nat-Soe-Kyi-Mya Bu” tiah min an khenh nain an tar lio a hmutu hna nih, Ca a tartu hi SAC ralhrang pawl an si,” tiah The Chin Journal ah an chim. Credit: The Chin Journal

Be the first to comment

Leave a Reply

Your email address will not be published.


*