Chin Ramkulh Ah Datsi/Diesel Man A Kai Tuk Caah Harnak An Tong

Umkalnak caah cycle hman bik a sinak Chin ramkulh ah atu bantuk in datsi man a kai lengah cawknak a har tuk caah khualtlawnnak le, mi a phormi mawṭaw pawl caah harnak tampi ton a si. Hakha khuami pakhat nih “Nizaan ah ka hawi nih a ka cawkter i 5 gallon ah 80,000ks le hmundang ahcun 90,000ks hrawng a phan, cawk ding cu a um rih ko nain a tampi cu a um ti lo. Zuar ding ngeih ti lo ruangah dawr a kharmi zong an um. Hakha ah datsi a dih a si ahcun cycle le mawṭaw ngeimi hna caah harnak tampi a um” tiah Khonumthung Burmese ah a chim.

Chin ramkulh Matupi peng zongah Datsi 1 litre ah 5000 tiang pek in kan cawk tiah khuami nih Khonumthung Burmese ah a chim. “Datsi man hi 1 litre ah 5,000 in 7,000 tiang a phan, dawrkhat le dawrkhat zong hi a man an i lo lo. Cawk awk a um lo, phorhnak hmanh a hartuk. 1 litre cawk khawhnak hmanh hi a har tuk” tiah khuami pakhat nih a chim. Tedim khua zongah datsi man a kai tuk i 1 litre ah 3,700ks hrawng pek a si i herh zat in cawk khawh a si lo tiah khuami nih Khonumthung Burmese ah a chim. “Tedim khua cu datsi 1 litre ah 3,700 hrawng a si, a man hi a kai chin lengmang, chim awk a ṭha lo. Cycle kan i put lawng ah cycle ah khat tein an kan rawn piak. I put khawh a si lo. Mawṭaw zong cu bantuk ṭhiamṭhiam in a si. Datsi dawr a kharmi cu an um rih lo nain a tam um ti lai tiah ka zum lo” tiah Tedim khuami nih a chim.

Mindat khua zongah SAC nih eidin le datsi/diesel phorhnak nawl a phih caah datsi 5 gallon ah 60,000-70,000 tiang pek in cawk a si. Paletwa khua zongah SAC nih Paletwa-Kyaukdaw ti lam a on cang ko nain thilri phorh ding rii khiahpiak a si caah datsi 1 gallon ah 14,000 in cawk a si tiah theih a si. Chin ramkulh khuapi hna ah datsi a dih rih lo nain a man kai tuk lengah cheukhat hmunhma cun cawknak hmanh a harmi dirhmun ah a phan. Crd; The Chinland Post

Be the first to comment

Leave a Reply

Your email address will not be published.


*