CHIN PASALTHA NUSALTHA MINUNG THONG 16 RENGLO TRAINING AN TUAH CANG

Tuzing ah CNA ralbawi Pu Solomon Thang Ding nih tulio training a tuahmi milu zat konghe pehtlaiin an dirhmun a chim. Ralbawi Solomon nih a chimmi cu CNA nih training an pek cang mi hna hi minung thong 16 renglo cu an si cang tiah a chim. Cu lawng siloin a chim tthan rih mi cu Training a tuahmi chungah hin kum 60 cunglei minung zong an um.

CNF nih training kan pekning hna or hriamtlaih dingin training pek dingah ah hin a sining te ahcun kum 40 cunglei hi pek an si lo nain, tutan thil kan tonmi kong ruangah tutan ah kum 60 lei zong an um hna i, cu chungah pastor hna zong an i tel tiah a chimchap. Cu kum 60 cunglei training atuahmi hna hi minung 20 hrawng cu an si ko lai tiah a chim chih.

No photo description available.

Thawngpang dang: Zahanzan Yangon khuachung i kahnak ah ralhrang kawlralkap lei in a thimi le hliam a tuarmi tampi an um hna tiah an chim. Zahanzan suimilam pakua hrawngah Yangon ramthen Kamaryut myone le Sanchaung Myone karlak MRTV thawngzamhnak zung a congtu ralhrang kawlralkap hna cu hriamtlai pakhat nih motor in an kal hnawh hna i an kah hna.

Kaphnih in kahdohnak fak ngaiin a chuak. An i kahnak hi ralhrang kawlralkap lei in hliam a tuarmi le a nunnak a liammi zong an um tiah an langhter. Hi konghe pehtlaiin pawngkam ah a ummi pakhat nih a chimmi cu Kamaryut le Sanchaung karlak Hantharwady hmunpi MRTV zung hmai ah an i kahnak hi a si tiah thawngzamhnak ah a chim.

Apeh tthan rih mi cu an i kahlio ah hin an pawngkam kan phak lio caan a si i, ralhrang kawlralkap a thimi pakhat an phurh lio zong ka hmuh hna. Cun a pawngkam ah a ummi motor chungah a tthumi pakhat zong hliam a tuar. Ralhrang kawlralkap lei hi hliam a tuarmi an tam ngai lai. Minute sawmthum hrawng an i kap i, cu hnu ah hriamtlai pawl cu motor in an zam hna tiah thawngzamhnak ah a chim.

Hi i kahnak konghe pehtlaiin ralhrang kawlralkap lei in siseh hriamtlai phukhat lei in a nunnak a liammi zat le hliam a tuarmi zat langhter asi rih lo. Kahdohnak a chuah hnu hriamtlai phu pawl an zam hnu ah ralhrang kawlralkap hna nih pawngkam lampi siseh hlei tibantuk zong an phih dih hna i, hriamtlai phu hna cu an kawl cuahmah hna tiah an langhter. Asinain hi thawngpang an langhtermi ahcun an hmu rih hna lo tiah an chim.

Be the first to comment

Leave a Reply

Your email address will not be published.


*