BIAFIANG TUNI I KAHNAK AH RALHRANG 20 AN NUNNAK ALIAM

Tuni CNDF le ralhrang kawlralkap i kahnak ah ralhrang kawlralkap a tlawmbik minung 20 an nunnak aliam. CNDF lei in minung pali an nunnak aliam ve. Tuni Falam peng CNDF le ralhrang kawlralkap hna cu tuzing suimilam pasarih le cheu ah an i kap. Hi i kahnak ah ralhrang kawlralkap lei in a tlawmbik minung pakul an nunnak a liam i CNDF lei in minung pali an nunnak aliam tiah CNDF nih thanhnak an tuah.

Tuni i kahnak hi suimilam pahnih chung hrawng asi i, i kahnak ah hin ralhrang kawlralkap minung tampi hliam an tuar. Cun CNDF lei zongin minung pathum hliam an tuar tiah an langhter i, CNDF lei in hliam a tuarmi hna cu an hliamhma a fak lo tiah theih a si. Hi konghe pehtlaiin CNDF lei nih cathanh an chuah ning ah cun ralhrang hna nih CNDF umnak hmun kah dingin hriamnam ngan he an fuh ruangah kahdohnak hi a chuah asi.

Atu lio ahcun ralhrang kawlralkap hna cu hnu ah an pil ruangah caan karlak kahdohnak cu adai rih. Asinain kahdohnak hi a linsa chin lengmang khomi asi caah tualchung minung hna cu ralring tein um uh law nan thinphang hlah uh tiah CNDF lei nih nawlnak le theihternak an tuah chih. CNDF cu mipi caah rian attuanmi kan si caah mipi nan caah harsatnak kan chuahter lai lo tiah an chim.

Hi konghe pehtlaiin a liamcia May ni 21 zongah ralhrang kawlralkap hna cu Falam peng Lumbang khuapawng ah CNDF nih an rak kah cang hna. Hi lio an rak i kah ah hin ralhrang kawlralkap lei in an hruaitu pakhat telh in minung paruk an nunnak arak liam i, CNDF lei in Salai Cung Nawl Piang kum 28 zong ram le miphun caah a nunnak arak pek ve.

No photo description available.

Thawngpang dang:Mizoram Ramri Ah Assam Police An Kal Than.Nihin June 29.6.2021 zinglei ah Assam palik le tupi zohkhenhtu hna cu Mizoram ramchung Mizo pawl dumtuahnak hmun Aitlang hnar lei ah tam ngai an rak ra than tiah theih asi. Assam palik hna hi Hailakandi SP, Sub-Division Officer- SDO le District Forest Officer- FDO hna nih an hruai hna i Vairengte mi Pu Lalchhandama thlam an hrawh pin ah Kunya kung cheukhat an phawi piak dih hna.

Assam palik hna cu Mizoram chungah an rak luh ruangah le Pu Lalchhandama thlam an hrawh mi duhlo in Vairengte mino hna cu Assam palik pawl umnak ah an kal colh ve.Hi thawng theih in Mizoram palik SDPO nih mino hna cu cozah bia le hla hngak dingin a chimh hna hnuah Mizoram palik le mino hna cu Assam palik pawl umnak ah an va kal hna i, kaphnih hruaitu pawl an i chawnh hnuah Hailakandi ah tonbiaruahnak ngei ding an hna tla.

Assam le Mizoram ramri hi hlan lio in kum fatin buainak a chuak peng mi asi. 2018 ah Mizoram Chief Minister hmasabik Pu Ch.Chhunga ram chungah MZP nih ramri kilvennak langhternak caah i dinhnak thlam an sak mi cu Assam palik nih duh lo in Sianghngakchia hna an velh hna, meithal in an kah hna caah buainak fak ngai a rak chuak bal cang. Credit: TCP

Be the first to comment

Leave a Reply

Your email address will not be published.


*