ATU CDF HE AA KAP CUAHMAH MI RALHRANG MILU ZAT, AN TAM NGAI

CDF pasalttha hna le ralhrang kawlralkap hna cu dinloin nithum chung an i kap cang. Tuchun ni zanlei tiangah pehzulh in i kahnak a chuak rih. Ruahsur lak zongah i kahdohnak a fak chinchin tiah theih a si. A liamcia August ni 13 ah ralhrang kawlralkap le CDF pasalttha hna cu Mindat le Matupi karlak ah zingka suimilam paruk hrawngin kahdohnak an thok.

Nithum chung i kahdohnak ah ralhrang kawlralkap lei in minung pakul hrawng an nunnak a liam i, hliam a tuarmi tamtuk an um tiah theih a si. August ni 14 chun suimilam pahnih hrawngah meng 14 a hlatnak hmun ah ralhrang kawlralkap le CDF hna cu an i kap tthan i, CDF lei in hliamfak lo minung pahnih an tuar tiah an langhter chih.

Ralhrang kawlralkap hna cu hmunhnih ah an i tthen i, hmunkhat ah hin zakhat tiin an i then hna. Meng 13 a hlatnak hmun ah a tuhi an um tiah tuanvo ngeitu hna sin in theih a si. Nizan an i kahnak cu meng 14 a hlatnak ah asi i, hi i kahnak ah ralhrang kawlralkap lei hi minung 150 renglo an si hna, Zingka suimilam pariat hrawng in meng 16 ah a ummi CDF hna cu hriamnam ngan in an kah hna.

Suimilam pahra hrawngah kap hnih in i kahnak a chuak tthan i, ralhrang kawlralkap hna nih hriamnam ngan in biatak tein an kah hna nain CDF lei in hliam a tuarmi le anunnak a liammi an um lo tiah an langhter chih. CDF hnu an soh i, meng 16 pawngah a ummi inn hna cu ralhrang nih an khangh hna. Meng 16 tiang an nawr hna caah ralhrang hna nih kan tei hna tiah an i ruat i, meithal an puah thluahmah tiah an langhter. Tuni zanlei zongah faktuk in an i kap cuahmah rih.

Thawngpang dang. Kabul Khua Khuaci a Mui: US Ralkap Vanlawng ah Kabul Khuami pawl an i Thlai Hna. Taliban nih Afghanistan ram khualipi Kabul khua an lak hnu ah Kabul khuami tampi nih Taliban uknak zaamtak ding in Airport ah an i pong hna. Kabul Airport hi US ralkap nih atu tiang an control rih. Afghanistan ah rian a ttuanmi US rammi pawl US lei ah phorh dih ding in Airport an control chung hi a si.

Afghanistan rampi President Ashraf Ghani zong ramdang ah a zaam cang.US nih Afghanistan in a ralkap pawl a lak tthan hna hnu ah Taliban nih Afghanistan rampi dihlak in an lak dih colh. August 6 ah Taliban nih Nimroz ramkulh an rak lak hmasa i, August 15 ah acozah tthutnak khualipi Kabul an lak. US le NATO nih tangka tampi dih in kum 20 chungpi Afghanistan ralkap an cawnpiak hna nain ni 10 chungte ah Taliban nih an tei colh hna.

Be the first to comment

Leave a Reply

Your email address will not be published.


*