TULIO PATHIAN RIANTTUANTU AN THIHNAK ARUANG TIMI AH FIANTERNAK

Tulai boruak kan theih cio bangin thihnak (pulhnat)in in nuai ciamco ih Pathian hnatuan kan rinsan zetmi pawl an thi tam zet. Riahsiatza taktak a si ih tui kum 2021 hi covid nat a thlen hlan ihsin Pathian hnatuantu thi an tam rengreng. ( Job 42:7-10;Isai.45:7 ),Hivek boruak a si tikah mi pahnih/khat in ralkap uknak duh lo ruangih lamzawhnak ah Pathian hnatuantu pawl an tel ve ih anmai kuang lo an nor ruangah a si an ti.

Himi thuah Job ih nun ihsin ka run simfiang duh. Job ih thu… Kan Bible sung Job ih thu hi a siartu le theitu tampi kan um ding. Job cu mifel,Pathian tihzahtu le duhdawtu a si ih Satan hmai khalah Pathian in a suan le a porh reromi minung a si. Satan cun Job ih Pathian a tihzah hi lei malsawm don ruang men ih tihzah ah a puh. Cutiak Pathian in a si lo zia fiahnak ah Job siatsuah dingah Pathain in satan kha a fial. Cutin Job cu ni khat sungah a neih zate,a faa le tiangin an thih ral theh hnuah amah khal besia zetin a naa.

Cutikah a rualpi Elifas, Bildad le Zofar pawl cun an hmuh tikah zatlak menmen le damlo menmen a si lo: Pathian hmaiah thil dik lo a tauhmi a um ruangah Pathian in a hrem siin an ruat. Curuangah Pathain hmai ih sual puangin ngaidam dil dingah an fial. Hmansehla cuvek a rak si lo zia thufiang a lang tikah Pathian in Job hnenah va feh in an hrangah ngaidam dil sak dingin va fial dingah a sim hai.

Ralrin tulmi: Miin siatnak,zatlaknak, thihnak le harsatnak an ton tikah duhduh in a ruang le a san rak rel sak mai ding a si lo. Pathian lung an tong lo a si ding tivek ih duhduh rak puh sak hi tih a nung in a that lo tuk ruangah rak ralring nasa aw. Leitlun a si ih mi dik le Pathian tihzahtu khalin harsat le vansiatnak ton a theih ringring. Ziangtluk in Thlarau ih khat le Thlaraumi,Pathain ti lungawitu si khal awla na tuar caan a thleng leh thotho ding.

Pathian hnatuantu pawl thih thu: Kan sim zo bangin tui tum Pathian hna tuantu pawl an thih tikah kan mangbang cio ih thenkhat in Pathian ti lungawi lo ruangah Pathian ih hremnak si awmtak vekin rel kan um. Hihi mangbang tuk in pol lo, pol ih puhmawh hawl ciamco ding siin ka thei lo. Ziangahtile miphun dang le ram dang khalin a tingtel in an thih phah. Linghnin,thlipi hrang,tlang puak, tilian le leimin tivek ruangah minung a tingtel in an thi ti kan thei.

Kan ram buai ruang khalah minung tampi an thi zo ih Pathian in mipi in hremnak kan ti cuang lo. Ramdang le miphun dang pawl ih tuarnak pawl vun zoh tla cun kannih Chinmi tla cu kan tuar mal tuk sawn. Leitlun ramdang le miphun dang pawl ih an rak tuar zo mi pawl malte ka run tarlang ding. Linghnin ruangih thihnak cu 1556 kum China ram Shensi ah mi 830000 an thi, 1737 kum India ram Calcuta ah mi 300000 an thi, 1755 kum Lisbon ram ah mi 60000 an thi, 1908 kum Italy ram Messina ah mi 100000 an thi,

1920 kum China ram ah mi 180000 an thi, 1923 kum Japan ram ah mi 143000 an thi, 1927 kum China ram ah mi 200000 an thi, 1932 kum China ram ah mi 70000 an thi, 1970 kum Peru ram ah mi 66000 an thi, 1976 kum China ram ah mi 225000 an thi, 1995 kum Japan ramah mi140000 an thi, 1999 kum Turkey ramah mi 40000 an thi, 2005 kum Indonisia,Tsunami ah mi 400000 an thi, 3,5,2008 Myanmar, Nakit ah mi 400000 an thi.

Hitlukin kan kiangkap ram pawlin thihhlohnak rapthlak an tuar zo ih kannih tui tum lawng si hivek thihhloh kan tuar. Kan tuar ve hi Pathian in a siang a si mai. Pathian hnatuantu khal tuan lotu khal siseh kan thih le harsat hi Pathian in a siang ti thei in puhmawh hawl hi a tul lo. Catialtu: Evan Mang Siah Luai

Be the first to comment

Leave a Reply

Your email address will not be published.


*