MITTHLI BAK A LUANG. CDF A SOISEL MI PAWL NIH KHAN REL UH

Tuzarh hramthok hrawng in khan, CDF zong hi ka zum hna lo, an cawlcangh a dik lo ti bantuk in biachim mi social media cahmai le comment tete ah hmuh a si. Hi bantuk biafang dawh lo CDF pasaltha le nusaltha cung ah zeitin dah kan chim khawh, cun hi bantuk bia dawhcah lo a chuah nak a ruang bik zoh tikah, Khrihfabu tanhnak, mah chungkhat le mah khua tanhnak thinlung in a chuak mi a si.

Zeitindah kan thutnak hmun in CDF hi kan soisel ngam hna hnga timi ruah ding a um: CDF pasaltha nusaltha hna hi, mino tete, mifim cathiam le hmaiei chunmang tampi he nitin nunnak caan a hmang cuahmah mi an si nain, an rumra ngeihnak, an chunmang vialte kal tak in, Furpi, cangvat le khuasak, nilin lak ah Lai meithal he ralhrang Min Aung Hliang a dir onh mi an si timi hi philh lo ah a tha.

CDF pasaltha nusaltha hna hi, mithat Lainawng men men an si lo. Laimi chung in mirum deuh, mah tein a thudir kho tuk mi, mah inn le lo ah nuam tuk in a thudir kho mi tampi CDF chung ah an um. A si nain Miphun zawn an ruah ruang ah, ram lak ah ihnak reprai ngei loin, Fikfa le khuasik lak ah harnak an tuar. Vawleicung fimthiamnak puitling in ser mi, hriamnam, bomb le Meithal thatha kha, Lai meithal te he an dir onh.

A ngai ngai ti ahcun Miphun an dawt ruang ah ram lak ah harsatnak an i thim lawng a si lo, an thisen tiang an thap, nihin tiang ah CDF pasaltha nih an nunnak an pek len cang. CDF/ CNF a dirkamh ngai le ram dawtu taktak bantuk in facebook cahmai kip ah aukhuan ngai, a si nain mah chungkhat, Khrihfabu, pengtlang le mah khua kong a hun phak ahcun CDF le CNF tu misual bantuk in hmuh tthan timi politics hi kan ral sunghnak a si lai.

Cu caah nunnak thap in ramlak ah Lai meithal he ral a do cuahmah mi, nuamhnak le chunmang thatha vialte kal tak in, harsatnak le thisen luannak lam aa thim mi CDF/CNF hna hi kan soisel tuk hna ding a si lo. Mah thut hmun in au tuk nain, ram lak ah va kal lawlaw ve law, an fiang lai. Siaherhnak he.. Photo Credit: Salai Propagandist

Be the first to comment

Leave a Reply

Your email address will not be published.


*