MIPI LE CDF RALKAP NIH KAN HNGALH AWK AHERH TIAH KA RUAHMI TLAWMPAL

Mizapi le CDF ralkap nih kan hngalh awk a herh tiah ka ruahmi chungin tlawmpal: Pakhatnak. Kan umnak hohmanh chimh lo ding. Mizapi zong nih kan khua ah an um, cuka ah ka hmuh hna ti kha chim len lo ding. A hlei in ral tuk ding dirhmun a phak tikah. Pahnihnak. Raltuk ding kan si tikah kan chungkhat, hawikom, duhdawtmi sinah thawngthanh lo ding. (Kan siaherh tuk si le thla rak kan campiak uh ti vial a za).

Pathumnak. Kan khua lei in hriamnam he an ra cuahmah i an ikap hnik rua kannih cu kan zaam lai ti bantuk, thla rak kan campiak uh ti bantuk ca post le midang sin chim kha hman bak lo ding. CDF nih zaam uh ti lo ahcun mah duh in tlikzam len lo ding. Palinak. Operation (Raltuk ding) kan chuah tikah commander nih phone a hman ahcun a za. A dang cu a herh si le second commander or field commander kha hman ve dingin commander nih a onh le cucu a za. Midang paoh phone off dih ding.

Panganak. Kan khua ah kan sang ah an ikap hnik nain zeihmanh ralrin an kan pe lo tiah a phunzai mi nan um theo. Ralrin kan in pek hna le nan zam ahcun kan ral nih pei an theih dih lai cu. A herh tiah kan ruah ahcun ralrin kan in pek hna lai i peklo kha a tha deuh kan ti sile kan in pe hna lai lo. Paruknak. Lamthlur pi i a ummi Gate hngak mi chekhlat tu CDF pawl nih zeitik hmanh ah zuurit buin khualtlawng lamlengmi horcer lo ding. Zuu a rii mi cu gate ah rian khinh lo ding.

Biahaltu upa nih sualnak a ngei tiah fehter hlan ah a chektu a tlaitu nih kutthlak bak lo ding. Pasarihnak. Kawl an si pek Lai an si pek zei miphun an si pek ah hrocer colh le kutthlak lo ding. Kan phung an buar zongah hngalh buin maw an tuah hram a silo ah an hngalh lo caah dah timi felfai tein kherhlai ta hnu ah a hngal lomi an si ahcun felfai tein fianh i ralrin pek ding.

Pariatnak. CDF ralkap nih ramchung ah siseh ramleng ah siseh cunglei CDF council hngalhpi nak loin eidin siseh tangka siseh bawmh hal lo ding. Herhmi a um ahcun mah le umnak hruaitu upa sinah chim ding. Bawmchan tu zong nih cunglei upa hngalh loin mah duh pikpak cio in kan ralkap pawl bawmh len lo ding. Hmailei ah i tlukruan lo nak le lungthin thencheunak a chuak kho.

Pakuanak. Lampi khualtlawng thilri tlaihkhihmi siseh, raltuk tikah ral hna thilri lakmi siseh mah le umnak hruaitu sinah felfai tein cazin he ap ding. A hlei in Dalan ti bantuk kam tlaihmi an thilri kha mah nawl in hman le i lak lo ding. Cunglei nih an ceih i a herh an tilo ahcun mah nawl in hrawh lo ding. Pahranak. Mizapi nih anmah lungtho tein an kan pekmi thilri tilo paoh lak lo ding. Kan herh taktak mi a um ahcun tha tein upatnak te he bawmh hal ding. Cun kha kha tha tein cazin ah khumh ding.

Kan Miphun runvennak rian kan tuan kan ti i kan mizapi nih an kan tih sual ahcun bialo si lai. (Hi ka tialmi hi CDF council nih a ceihchahmi asilo, asinain ka hmuhton mi chungin kan ralkap siseh mizapi siseh kan hngalh le zulh a herh tiah ka ruahmi ka hun in hrawmhmi hna a si.) By: Salai Ngun San Aung

Be the first to comment

Leave a Reply

Your email address will not be published.


*