COVID THIHNAK HI PATHIAN HREMNAK A SI MAW? BY. BISHOP DR. CK NO CHUM

COVID-19 thihnak hi Pathian hremnak a si maw? Mitampi nih atulio Covid in a zawmi le a thimi hna kong ah Covid-19 hi Pathian hremnak a si, Pathian chimhhrinnak a si tiah khoikamaw Bible caang tete khi i lak in prophet ka si tiah i hro le i cer le mi ṭhihphaih pah in a au sekmi an um len. Dr. CK Hrang Tiam zong nih a phungchimnak ah, “USA um mi prophet pakhat lebang nihcun Covid in a zaw i Oxygen he a thimi cu Hell ah an kal lai a ti,” tiah a kan chimh.

A ping le a pang in kan zumh sual nakhnga lo, 1 Thessalon 5:9 kha rel hna usih. Zeitintiah, Pathian nih a thinhunnak intuar ding ah a kan thim lo, kan Bawipa Jesuh Khrih thawng in khamhnak hmuh awk ah A kan thim.” Cucaah Pathian hrem le thah ding kan si lo ti i fiang in i lawm hna usih. Pathian nih A thinhunnak A bungh/tawih lai ahcun A thimmi Noah le a chungkhar hna cu a khamh in a fimtawl hmasa hna.

Cu bantuk ṭhiamṭhiam in Sadom le Komorah khuapi ah Pathian hremnak mei A surter hlan ah A thimmi Abraham tupa Lot techungkhar cu a fimtawl hmasa hna. Cucu asi, Pathian thimmi hna caah cun A thinhunnak tuar ding ah si loin Jesuh Khrih thawng in Khamhnak hmuh ding caah thim kan si,” tiah a kan chimh mi sullam cu a si.Pahnihnak ah Hebrew caṭialtu nih Heb. 12:6 ah, “Zeicahtiah Bawipa nih a dawtmi hna cu dan a tat tawn hna i fa i a cohlan mi hna cu a chimhhrin tawn hna,” tiah a ti.

Ahmaan, chimhhrin cu dawt ahcun a um mi a si ko. Asinain, cucu kan thih nakding ca ah si loin kan i chir, ka i sersiam in kan ṭhat nakding caah Pathian tinhmi a si.Covid-19 hi Chimhhrinnak a si a ti mi an um ve tak i, si dawh ngai in an phuan ve ko nain, “ thi lak i chimhhrin” cu chimhhrin a si kho lai lo dah. A chimhhrinnak i a thih ahcun a chimhhrinnak cu a ṭhahnem ti hnga lo.

Chimhhrin cu i chir seh, i thleng seh, tinak caah si kaw, thih hnu ahcun an i chir kho ti lai lo cuh. Kan pastor ṭhaṭha le kan mi ropui tampi hna hi an sual ruang ah Pathian nih thi lak in a chimhhrin hna ti cu ka tuk a sum tuk. Asi, David zong kha A dawt caah A rak chimhhrin bak ve. A chimhhrin mi David nih ka sual ti aa hngalh i aa chir khawh nakhnga, muidawh ruang ah a tlukpi mi Uraiah nupi he an hrin mi fapa te a thi.

Khakha chimhhrin cu a si. Cucaah David zong aa chir ruangmang ve ko khah. Kan pastor tampi an thi, ram le miphun nih kan i bochan mi tampi nih an kan liamtak. A si kun ah, an nupile Pathian nih A chimhhrin hna kan ti ne hnga maw? Satan cu fir ding, hrawh ding le thah ding ah a ra. Kan pi Eve le kan pu Adam in a kan hrawh i a kan thah cuahmah ko hi teh. Kan pum cu a hrawh khawh ko nain Zungzal mi kan sinak cu a kan tawng kho lo. A kal hmasa hna he kan i tong ṭhan te lai. Haleluijah.

Zeicahdah Vawlei a dawt caah A fapa hmanh petu, Dawtnak le Ngaithiamtu Pathian hi A ing a chiami, A thin A hung pengmi, A tlanhmi A fale thah le nawn rumro a ruatmi phun rumro hin an hmuh hnga? Pathian cu sual ngaithiamtu, damtertu, dawtu le khamhtu Pathian hi A sining tein an hmuh khawh ve i ṭih le phannak he si loin hnangam deihnak he lawmhnak an chim ve khawh nakhnga thlacampiak bu in, Bishop Dr. CK No Chhum

Be the first to comment

Leave a Reply

Your email address will not be published.


*