CHINRAM AH RALHRANG SAKHAN 56 A UM, CU CHUNGAH

Chinram ah Kawl ralhrang camp 56 a um. Atu pakhat thio asi i June thla ah Makui Ingnu camp thio asi cang. Kan lung airual ah cun hi ralhrang pawl camp vialte hi an dihlak in kan thio ko hna lai. Lungler camp hi fek taktak in an sak mi camp asi.2019 lio ah TABC mino khawmpi cu Lungler ah kan rak tuah. Nungak tlangval lawngte 300- 400 TABC Mino program in nuam tamtak in kan rak itong hna. Ralkap camp pawng Lungler certual ah lente celh nak cu asi.

Ralhrang pawl nih an camp kutka ah ca pa hnih an tar; Hi ralhruang cu Zeitik hmanh ah hnu lei piltak loding mi ralhruang asi timi le; Ka thih hlanlo hi ralhruang hi ka ven lai tiah ca an tar. An ralhruang cu ka rak hel ka rak zoh i hman ka rak ithlak sek.Hi tluk i a fek mi ralhruang le ralhrang nih zeitik hmanh ah hnulei pil tak lo ding le thih tiang in ven ding an timi camp cu CNA le CDF Thantlang nih ni hnih chung an kulh, ralhrang lei in fighter jet tiang in bomb a rak thlak na in an lak ko. Hi tluk a fek mi camp hmanh nihnih chung ah an lak khawh ah cun a dang camp pawl zong hi CNA le CDF nih an lak khawh dih ko lai tiah ka zumh ngai.

Zei ruang ah dah na zumh tiah an ka hal ah cun hitihin ka leh hna lai. Thinlung in kan tei tuk cia hna. Raltuk ah abiapi bik mi cu thinlung asi. Ralhrang hi an thin lung in an sung cia i kan nih CNA le CDF nih thin lung in kan tei cia hna. Raltuk lei ah minthang bik strategy thiam Suntzu nih Ral cu tuk hlan in thin lung in tei cia a hau ati.Hi Lungler ralhrang camp thio nak ah hliamhma a pu mi, a thisen le a thlanti a luang mi, ralttha taktak in a do mi hna upatnak salam pek bu in. Salai Bawi Lian Mang

Rev. M Thawngkam Cabia: Ral le Bible. Tulio kan ram cu ral buainak ikah thawng, ithah thawng nih a khuh. Kan I thimmi a si lo. Hrial khawh zong a si lo. Khrihfabu tiang thukpi in a hnursuan. Pastor te an hmuhning aa dang. Minung ruahnak ikhahlo men silo in Bible cawnpiaknak cung ah idan a si. A cheu nih pumpak in siseh, Khrihfabu in siseh ral dohnak ahcun kan I tel awk a silo. Meithal cawknak ah phaisa kan pek awk a silo an ti. A cheu nih Israel mi zong ral an tu, Pathian nih pei a dohpi hna cu. Cu caah kan I tel awk a si an ti ve. Bible I tlaih ciocio a si. Nan hawi kha va daw hna ulaw nan ral kha va hua hna u tiah an titawn.

Sihmanhsehlaw nan ral kha va daw hna ulaw an hremtu hna kha thla va cam piak hna u. Cuticun vancung khua I a ummi nan Pa fale cu nan si lai (Mt.5:43-45) tiah Biakam Thar nih a ti. Biakam Hlun chung ah Bawipa nih Samuel kha Saul sin ah a thlah I ‘a tucu va kal law Amalek kha va tu, an ngeihmi vialte kha va hrawk dih; zuah hna hlah. Pa thlulo, nu thlulo, ngakchia thlulo, bawhte thlulo, cawtum thlulo, tuu thlulo, kalauk thlulo, laa thlulo in va that hna’ a ti (1 Sam.15:3). Cun, (Jeriko) khua chung I a ummi vialte cu, nu he pa he, tar he no he, cawtum, tuu le laa he tiah vainam in an sam dih cikcek hna’ (Joshua 6:21) ti kan hmuh fawn. Hi bantuk hi Biakam Hlun chung ah voitampi kan hmuh.

Na ral caah thla va cam a titu le (nan ral kha) va that dih hna u a titu hi Pathian dangdang maw an si hnga? Asiloah, Chanhlun lio Pathian kha thin tawi in a rak I palh bia maw a si hnga? Chanthar a phak tik ah a lung aa thleng I a piangthar than i maw a si ne hnga? A si kholo. Aa thlenglomi Pathian pakhat sin in a rami Bia an si! Pathian cu aa palh ballo. A khuakhan nak cu a ding zungzal. Amen! Hi aa kalhmi Pathian Bia hi zeitindah kan pom lai? Biakam Hlun thate na rel ahcun Israel miphun kha na mitthlam ah a cuang colh kolai. Aho chimh hmanh a haulo. Biakam Hlun cawnpiaknak I a hmuisel cu miphun le ram a si.

Biakam thar cawnpiaknak nihcun pumpak aa hmaithlak ve. Pumpak cawnpiaknak a simi ‘na ral va daw law thla va campiak’ ti hi miphun cung hmanding ah aa tlak kholo. MAH cu kan ral ah hei chia ko usih. MAH dawt le thlacam piak hi soisel awk a si rihlo. Sihmanhsehlaw MAH nih a hrawhmi le a thahmi lengluang hmuh ko bu I daite um ding hi Bawipa nih a kan duh piak ko hnga maw? Cubantuk cu pei hlan Profet vialte nih an rak dohmi kha a si cu. Israel tuarnak a hmu I a chanhtu kha kan Pathian a si. Samaria Mithapa thangthat a sinak cu hremmi pa a dirkamh ruang ah a si.

Pumpak hmuisel cawnpiaknak kha miphun ca ah aa tlak tawnlo bantuk in miphun hmuisel cawnpiaknak kha pumpak ca kan hman ahcun pial a fawi tuk. Thenhai a hau.Pumpak in an huatu le na ral na ngaihthiam ahcun a dam dih. Miphun raldohnak ah aho khi pumpak in va huat a umlo. A ho khi thla va cam piakding a umlo. Pumpak ca thla vacam piaknak nih ral kha a daihter in a dongh ter kholo. Cucu an I dannak a si. Tulio kan tonmi buainak hi pumpak thil a silo. Miphun le Ram kong a si. I awtawm hlah. Na tuah hnga ding kha tuah ko. By, M Thawng Kam

Be the first to comment

Leave a Reply

Your email address will not be published.


*