AN KHAM RUANG MANG CANG, HMAICHIA AN TUAH BAK KO HNA HIH

TCP: Myanmar Embassy ah Ralhrangbu nih Thlahmi Palai 2 Visa An Pe Duh Hna Lo Japan nih Tokyo,Myanmar Embassy ah Ralhrangbu nih Thlahmi Palai 2 Visa An Pe Duh Hna Lo. Japan khuapi Tokyo, Myanmar Embassy caah ralhrangbu nih riankhinh mi palai hna cu Japan nih an ram luhnak nawl a pe duh hna lo tiah Tokyo news nih a tial.

Tokyo, Myanmar embassy riantuan 2 U Aung Soe Moe, secretary 1 le Secretary 2 hna cu ralhrangbu nih uknak a lak duh lo in CDM an tuah ruangah ralhrangbu nih an rian in a phuah hna i, an aiawh a khinhmi hna cu ralhrangbu nih Japan sin ah an ramchung luhnak nawl a hal.Ralhrangbu nih rian a pek mi hna pahnih cu kan ram kan luhter a si ahcun ralhrangbu kan pom ti nak a si lai caah kan ruah lio a si.

Mah chungah ralhrangbu nih rian in an phuah mi hna pahnih hna riantuannak cu Japan nih kan cohlan rih ko tiah an ti. Ralhrangbu nih CDM a tuah mi embassy riantuan pahnih hna cu an rian le an passport hna cu kan hlawnh piak cang hna ruangah an document hna cu pom piak ti lo dingin Japan foreign ministry sin ah March thla ah khan ca a kuat.

Asinain,Japan nih ralhrangbu cawlcanghnak a duh lo mi Japan embassy riantuan pahnih hna cu an ramchung umnak nawl a pek hna lengah palai bantukin rian an tuan khawhnak caah a herh mi vialte a tuah piak dih cang hna tiah kyoto news nih a chim.Japan hi ralhrangbu nih nawlngeihnak a lak hnuah tlaih mi Daw Aung San Suu Kyi le tlaihmi vialte thlah colh dingin a hal mi ram pakhat a si. Credit: TCP

Adang cabia:Ralhrangbu nih ‘Military Council’ tiah Hman lo dingin nawl a chuah. Military council (စစ္ေကာင္စီ) tiin a hmangmi hna cu hlathlainak kan tuah lai i, dan kan tat hna lai tiin Rakhine state administration council chimnak nawlngeitu U Hla Thein nih DMG he biahalnak ah a chim. Ralhrangbu le a kut tang press council zong nih military council tiin tial le hman lo dingin nawl a chuah cang, ramchung remdaihnak a hrawk khomi cafang hna cu print tuah in kan fim dih. Media zulhphung he kalh in a hlei vuangin tial mi zong kan hmuh a si ahcun action kan lak hna lai. Nawl a ngai lo mi an um si ahcun ralrinnak le press council sinah kan report hnuah a herh ningin dantat an si lai.

Mah biafang a hmang mi Rakhine media hna zong an um rih, mah biafang hi an caah tih a nung mi a si. Hrial ah a tha, cunglei nih nawl an kan pek mi a si tiah U Hla Thein nih a chim. Ralhrangbu nih atu bantukin an ti mi hi media hna cungah censorship an tuah mi a si. Ralhrangbu nehsawhnak phun ah an ruah rua?Ralhrangbu nih uknak kan lak an ti zongah siseh, uknak kan control an ti zongah siseh council cu an mah nih an ser mi a si. Ralkap ti zong, council ti zong a dik dih ko.A taktak ti ahcun fact a dik mi, thleidannak a um lo ding, thawng kan lak nak hna an him ding hna cu media zulhphung bak a si.

Thawng kan lak nak hna zong nih biahal nak a um ahcun an chim ve a hau. Hi tin si lo in tial dih hnuah thleidannak nan ngei ti mi cu mi palhnak a kawl mi an si tiah Myanmar Press Council chungtuan U Myint Kyaw nih a chim.Development Media Group, operation manager Ko Zaw Zaw nih; nawlngeihnak a ngei mi hna duh mi lawngte kan tial ahcun media zalonnak cu khua zeidah a um cang lai. Hlan lio bantukin media pawl hi thihphaih khawh kan si ti lo. Dik nak lei mipi an um peng ko. Media pawl nih lobby kan tuah mi a si lo. A cang mi le kan hmuh mi bantuk tein mipi sin ah thawng kan thanh mi a si. Ralhrangbu nih an ser ruangah (စစ္ေကာင္စီ) tiah kan hman mi a si tiah a chim.Ralhrangbu nih uknak an lak hnu February 1 in ralhrangbu nih media cheukhat hna cu an zung an hrawh, an khar piak hna lengah cheukhat an tlaih hna. TCP

Be the first to comment

Leave a Reply

Your email address will not be published.


*