ZOHCHUNTLAK, AMAH HMAN DING HMANH CHIAH LOIN OXYGEN DUR 150 A HLUT

Zohchuntlak Kawlram minthang Khine Hnin Wai nih amah hman awk hman ngeiloin Oxygen dur 150 cu mipi sin ah a lak tein a phawt dih hna. Hi konghe pehtlaiin Khine Hnin Wai nih a timi cu Oxygen dur ka cahmi a rak phan. A harh bikmi hna caah ka phawt dih hna. Oxygen a hartuk lio caan asi i, a herhtuk mi vialte hna sin ah ka pek khawh lomi cu a poituk ka ti.

A harh taktak mi hna sin ah man lo tein ka pek hna i, nan hman dih lo asi ahcun midang rak pe ve hna uh tiah kan cah duh hna. Oxygen a herh ko nain a tingco lomi vialte hna rak ka theithiam hram uh tiah zaangfak kan nawl fawn hna. Keimah zong zarhkhat hrawng ka dam ve lo. Asinain keimah hman ding hmanh i chiah loin ka pek dih hna, aa ka bawmtu nan zate cungah ka lawmtuk tiah a chim.

Khine Hnin Wai hi ngakttah a cawmtu zong a si i, Yangon khuapi chungah zohkhanhtu ngeilo hngakchia an hlonh mi hna lunglawmte in a zohkhanhtu zong a si. Tthenkhat nih cun hngakchia hi a sin hna ah an zuar tawn ti a si. Mipi caah siseh, nu le pa ngeilo hngakchia hna caah asi khawh chungin rian a ttuanmi zong a si.

Thawngpang dang: Naite ah ralhrang SAC nih UN ah Myanmar palai U Kyaw Moe Thun cu Myanmar ah kuat dingin US cozah sinah halnak ca an kuat. Hi ralhrang halnak ca kong he pehtlai in VOA nih cun US Cozah sinah an ruahnak an hal hna tikah a tanglei bantukin email in lehnak an tuah. Myanmar ah ralkap nih nawlngeihnak nan lak i democracy phung an buarmi cu UN ah Myanmar palai U Kyaw Moe Thun nih a cohlang lo i vawleipi theih in Myanmar ram caah a dir ngammi hi US nih kan thangthat.

US hi Myanmar mipi hna leiah a dir peng ko langhternak caah U Kyaw Moe Thun telh in Myanmar ram ah democracy a um than khawh nakhnga aa zuammi bu le pumpak hna he pehtlaihnak kan tuah peng lai. Myanmar mipi hna cu kan bawmh hna lai i ralhrang nih a ruang um loin an tlaihmi hna thlah ding le an tuahmi thatlonak vialte ngol dingin zongin kan hal fawn.

Nawlngeihnak an lak hnuin kumtlinglo ngakchia telh in rammi 900 leng thah an si, democracy caah a cawlcangmi tampi tlaih le khih an si fawn. Hihi zeihmanh sullam a ngei lomi a si. Myanmar ram ah a dikmi democracy a um than khawh nakhnga ramkip nih kan i zuam lai i ralhrang SAC cungah dantatnak zong kan tuah chin lengmang lai” tiah US ramleng vuanci zung in chimnak nawlngeitu nih VOA sinah lehnak ca a kuat hna.

U Kyaw Moe Thun nih cun Feb 1 ah ralhrang nih nawlngeihnak an lakmi cu a cohalng kho lo Feb 26 ah UN meeting pi ah Myanmar mipi hna leiah a dirnak kong a phuan. Cuticun Feb 27 ah ralhrang SAC nih U Kyaw Moe Thun cu a rian in kan chuah tiah cathanh an chuah colh. Cu lawng si loin anmah minung a simi Bohmu Aung Thu Shing cu U Kyaw Moe Thun aiawhtu kan khanh tiah an ti fawn.

Asinain atu tiang UN nih ralhrang SAC palai cu an cohlang lo i Myanmar aiawh in U Kyaw Moe Thun cu UN meeting ah a kai peng rih. Aho deuh hi dah an cohlang te hnga ti cu a ra liomi September, 2021 ah a fiang te lai, tiah theih a si. Credit: TCP

Be the first to comment

Leave a Reply

Your email address will not be published.


*