US NIH A LUNGTLIN LONAK A CHIM CANG. RALHRANG BIA KONGAH

Ralhrang kawlralkap hna nih kawlram thimnak tuahnak tthan dingin timhtuahnak an ngaihmi kongah US alungtling lo. Hi konghe pehtlaiin US Foreign Minister Antony Blinken nih a lungtlin lonak a chimmi cu kum hnih chungah thimnak dang tuah dingin timhtuahnak an ngeihmi cu nawlngaihnak caan an sauhter duh ruangah a si. Kawlram ah hin ASEAN Myanmar Palai chiah colh dingin ASEAN ram pawl a ti hna.

Min Aung Hlaing nih nizan bia a chimmi ah kumhnih chungah thimnak ding, cun ramkhel kongkau buainak zong phisin dih dingah ASEAN he ttuantti dingin hnatlaknak tuah asi tiah a chim. ASEAN palai hna he ttuanti i, ASEAN nih ruahnak cheuhmi chungah kuttlai in ttuanti dingah timhcia peng kan si tiah a chim. Asinain zeibantuk dah timi tucu fiang in a langhter lo.

Kawlram buainak phisin dingah ASEAN palai ding kongah buainak a um. ASEAN palai hna nih cun August nihnih meeting an tuahnak ah lungtlinmi an ngaihmi cu Brunei Foreign Minister changtu a simi Mr. Erywan Yusof hi ASEAN-Myanmar palai caah an lungtling tiah theih a si. Asinain ralhrang kawlralkap nih cun Thailand ram palai tthing an duh ve ti a si.

Hi konghe pehtlaiin Indonesia Foreign Minister nih a timi cu kawlram chung buainak kong ceihkhannak ah hin karhlan a har ngai i, a liamcia April thlah ah hnatlaknak tuahmi panga zong ttuanchuah mi a um rih lo tiah thawngzamhnak ah a chim. Hnatlaknak panga an tuahmi chungah ralkap le ramkhel pawl i ton i ceihkhannak tuah ding an ti, nain zeihmanh an tuahmi a um lo.

Ralhrang hna nih anmah duhnak in kum 2023 ah thimnak kan tuah lai tiah an ti tthan. ASEAN-Myanmar palai ah ahodah thim or thlah a si lai timi hi a fiang rih lo nain an ttuan dingmi riantu cu tuahcia dih a si cang tiah an chim.Kawlram chung ramkheel kongah zeibantuk minung paoh tonnak ngaih dingin timhlamhnak ngeih a si i, Suu Kyi le Win Myint tuhi an ton khawh hna le ton khawh lo a fiang rih lo.

Hi konghe pehtlaiin ASEAN nih an langhtermi cu kawlram chungah bomb nak zong a si cang. Cun covid khamnak sii zong bomhchanhnak tuah dingin tawlrel cuahmah a si tiah Indonesia Foreign Minister nih a chim. Ralhrang kawlralkap hna hnatlaknak tuahmi zong an zulh lo pin ah Min Aung Hlaing nih amah tein Prime Minister rian aa pek.

Be the first to comment

Leave a Reply

Your email address will not be published.


*