UPDATE: KIA LE RALHRANG I KAHNAK AH TAMTUK RALHRANG AN THI

Update:KIA nih ralhrang kawlralkap tamtuk an thah tthan hna. Moe Mauh peng Doh Phung Yan khua pawng ah KIA nih ralkap an kah hna i, ralhrang kawl ralkap minung 20 leng an thi.June thla ni 3 zinglei nazi 10 hrawng ah Banmaw mawtaw lam piin Doh Phung Yan lei ah a rak kai mi ralkap minung 100 leng cu KIA brigade 19 nih an kah hna caah ralkap lei minung 20 leng an thi tiah theih asi.

A thi mi ralhrang kawlralkap ruak pawl cu Doh Phung Yan le Nuam Lanh ah a um mi ralkap pawl nih zaan lei ah an vui hna tiah khuami hna sin in theih asi. Kap hnih I kah doh nak ah ralhrang kawlralkap lei hiramnam cheukhat zong KIA lei nih an lak khawh tiah KIA lei nih thawng an thanh. Tu ni June thla ni 4 zong ah ralkap minung 100 leng cu zahan kah doh an tonnak lam pi ah an rak kai than tiah theih asi.

Ralhrang kawlralkap le KIA tutan an i kahdohnak hmun Doh Phung Yan khua hi KIA an um bik nak hmun he a naih pin ah Alawbum tlang tang ah a um mi khua asi. A tu lio ah mah hmun le hma ah hin ralhrang kawlral kalkap minung 800 leng cu hmunhma an la tiah theih asi. KIA le ralhrang kawlralkap i kahnak hi a zual chin lengmang cang tiah an chim.

Nikhat Chungah KIA Le Kawl Ralkap Voi (4) Bak An I Kap -

Thawngpang Dang:Surkhua Mi an Zaam Dih hna, Tar Lawng Khua ah an Taang. Hakha peng, Surkhua ah SAC ralhrang pawl an rak luh caah khuami an zaam dih i, a zaam kho lomi kum upa tar minung 20 in 30 karlak hrawng lawng khuachung an taang, tiah thawng kan theih. SAC ralhrang pawl Surkhua an phak hnu ah khuachung ah meithal an puah hnawh len hna caah khuami an um ngam ti lo i an zaam dih hi a si.

Minung pakhat nih, SAC ralhrang pawl an rak phan i zaan ah khuacung ah voi tam ngaite meithal puah sawh in an puah len. Khuami pawl an um ngam ti lo caah an zaam dih hna. A zaam kho lomi tarnu tarpa pawl cu biaknak lei rianttuantu hna nih an zohkhenh hna, tiah a chim. SAC ralhrang an phak hnu ah Surkhua a zaamtakmi hi an zapi in 1,700 in 1,800 karlak hrawng an si lai, tiah a cunglei minung nih a chim chap.

June 1-2 tiang SAC ralhrang pawl cu Surkhua meithat zung ah hmunhma an khuar nain June 4 ah cun Surkhua ah an um ti lo, tiah khuami pakhat nih a chim. Loklung khua in a zaammi hna zong atu tiang khua an hlam kho rih hna lo, tiah thawng kan theih. Credith:The Chin Journal

Be the first to comment

Leave a Reply

Your email address will not be published.


*