THAWNGPANG TTHA, RALKAP CAAH THAWNGPANG CHIA TAKTAK

Thawngpang ttha pakhat a chuak. NUG Cozah lawnglawng Kawlram aiawh in ka pehtlaih lai i a lamkip in ka dirkamh lai tiah South Korea President Office nih cathanh an chuah nohl cang.Kawlram Democracy uknak phung a um khawh thannak ding ah siseh, Kawlram ah daihnak a um than khawhnak ding ah ramkip Cozah he biatak tein kan cawlcang ti lawng si loin, kan mah Korea Cozah zong biatak tein kan i zuam peng rih lai tiah cathanh an chuah mi ah an langhter.

NUG Cozah he pehtlaihnak kan ngeih lawng si loin, NUG chung lutlai he neihniam tein kan i chawnbia peng, an mah he lawng pehtlaihnak kan tuah lai, kan i pehtlai peng rih lai tiah South Korea Cozah nih cun a chim. NUG Cozah nih official tein pomnak aum khawhnak ding ah minung 268,000 leng nih minsen thutnak in South Korea Cozah sin ah halnak an tuah nak kong zong cathanh an chuah mi ah cun an langhter chih. Cun Kawlram ah Democracy uknak phung a um thannak ding ah le daihnak a um thannak ding ah siseh, ram mipi ralkap kut a tuar mi vialte hna caah, tlaih a tong mi le thongthlak mi vialte, Daw Aung San Suu Kyi telh in thongtla vialte an luatnak ding zong halnak a tuah fawn.

Thawngpang dang: Ralhrang kawlralkap nih Kalaymyo ah minung pahra nak tlawmlo an tlaih tthan hna. Tuni August ni 26 ah ralhrang kawlralkap le palik hna nih lamzawhmi hna cu an tthawl dawi hna hnu ah minung pahra renglo an tlaih hna tiah theih a si. Tuzing ah Aung Min Man sangah lamzawhnak a tuahmi hna cu uniform aa hruk lomi ralkap le palik nih meithal he an rat hnawh hna.

Motor pali in an ra i, minung sawmnga hrawng an si i, lampi pali ah an kham hna i, minung an tlaih hna. Palik le ralkap pawl nih lamzawhtu hna cu an kawl hna i, inn chung tiang lut in an kawl hna. Lampi ah minung aa chawkvak mi zong an tlaih rih hna. Culawng siloin cycle panga an lakpiak hna i, an tlaih mi hna hi nu pariat le pa pali an si.

Cun kumtling lo minung zong an tlaihmi chungah an i tel hna tiah theih a si. Hi konghe pehtlaiin Nizan Aung Thet Sa sang zongah palik le ralhrang kawlralkap hna nih inn pakhat an kulh i, hmunkhat rawl a eimi minung pahra renglo zong an tlaih rih hna. Cun Myomah palik zung pawngah inn tthenkhat zong khual cazin check in minung an kawl rih hna pin ah tangka tingruk an lakpiak rih hna.

Tutan ah ralhrang kawlralkap le palik hna nih lamzawhtu an tlaih hna nak a ruang cu lamzawhtu chungah PDF pawl an i tel timi thawngpang hman lo an theih ruangah asi tiah an chim. Kalaymyo ah ralhrang kawlralkap hna nih uknak an lak hnu in sualnak ngeilo minung sawmli renglo an nunnak a liam cang i minung zakhat renglo an tlaih hna tiah an langhter chih.

Be the first to comment

Leave a Reply

Your email address will not be published.


*