RALKAP MINUNG 2000 NIH MIN AUNG HLAING AN CHUAK TAAK

Ralkap minung thonghnih hrawng nih Min Aung Hlaing chuahtaak in CDM an tuah cang. Ralhrang kawlralkap hna nih nawlngeihnak an lak hnu Thlaruk chungah CDM atuahmi ralkap pawl hi minung thong hrawng an phan cang tiah an langhter. Hi konghe pehtlaiin People’s Board of Directors Lieutenant General Lin Htet Aung nih a tanglei bantuk in a chim.

Ralkap bak in a rak lutmi hi minung thongkhat le zanga hrawnghrang an si i, palik in alutmi pawl he fonh hna ahcun thonghnih renglo an si lai tiah Irrawaddy thawngzamhnak ah a chim. People’s Board timi hi ralkap in CDM a tuahmi National Unity Government le CDM he attuanmi ralkap konghe pehtlaiin bawmchantu an si hna.

Hi bu ah director a ttuanmi Lieutenant General Htet Aung zong hi ralkap sianginn in a dihmi a si i, Shan ramkulh nichuahlei Light Infantry Division 528 ah Tat Khwe (တပ်ခွဲ) tuanvo latu asi. Amah hi a liamcia April thla thok in CDM atuahmi a si. CDM ah a lutmi ralkap pawl chungah Colonel rank tiang a phan mi hi minung za renglo an si. Cun training apetu zong an um hna i, meithal he raltuknak hmun ah a ummi zong an i tel tiah a chim.

Myanmar′s military: A state within a state | Asia | An in-depth look at  news from across the continent | DW | 12.02.2021

Cabia dang: NUNNAK PAKHAT PE SIANGTU HNA CDF/CNA. Pakhat te lawng ngeihmi thil hi a sunglawi khun tikah midang va pek hi a fawimi a silo. Kan Bawipa Jesuh lawng nih vawlei a dawt hringhran caah a fapa ngeichunh te a pek. Mi pakhat nih vawlei pumpi co dih hmanhsehlaw a nunnak a sungh tung ahcun zei tal a miak hnga maw? Miak hlah a ti bantukin zeizong vialte ngeih ko zongah kan nunnak pakhat te lawng a simi hi kan thih ahcun kan ngeihmi vialte santlaihnak a ngei lo.Cucu nunnak pakhat te lawng kan ngeihmi a singlawi tukmi cu ui lo tein miphun le ram dawtnak ruangah nunnak pek a siangmi CNA/CDF/ CNO/CNDF pawl an si.

Lai meithal thalpak he hriamnam tha aa ngeihmi ralkap dirhnawh cu hohmanh nih an ngamhmi a si lo nain dawtnak a tthawn tikah nunnak pek kha Miphun le ram caah a si ahcun tiin thih le nun ri ah zan ih merem lo le rawl ei chungpil kho loin ramtlawng sa bang zingzan thlu lo ruahsur nilin thlu loin fingkip tlangkip an cul. Kan pupa hna keneh dawh zultu mino nan si. Laimi pa raltha an ti tawnmi a hung lang i Vakok nun tahchunh in zumhtlak nun aa tahchunhmi hna miphun le ram caah zumhtlak tein dir tti caan a cu.

Chungkhar ah nuam tein khua a sa mi mino hna chungkhar, nu le pa, khua le ram le hawikom dawt he tthen in Lai thalpak he raldoh i thawh hi a fawimi a si hrim lo.Meithal nakin a tthawng deuh mi lungthin ralthatnak he miphun luatnak caah tiah thih ngamh mi hawidawt hna upatnak kan in pek hna. Sunghno nu le pa nih innka tung tlaih in fadawt kir zai rel tawn ttheu lai i semmawng hngakchuan le thaisung dawt hna nih papa te a nun him hnga maw tiin mitthli he kan biak zingnu sinah thla za cam tawn ttheu hna lai mu.

Gideon le a ralkap teinak a petu Pathian nih teinak in pe ko hna seh. Raltuknak hi Video lawngin kan zoh tawn i kanmah cungah a tla lai ti zong kan zanmang hmanh ah manh bal lomi kan duh lomi kan cungah a tla tikah midang nih va doh ko hna seh ti caan a si ti lo. Midang thi hna sehlaw kei nung ning ti awk tha ti lo. Ka miphun le ram caah ka miphun an thihnak ah thih ve le nun ve kan i thim a hau cang. Kan dam ah Mino tampi kan um ko nain CDF/CNA ah tlawm tuk lawng thawh a si tikah lung cu a hmui kho dih lo.

A dam ko i fim ko mi nih tutan thil kong ah cun i thawh a hau cang. A dam ko i a lungfim ko mi mino tho u sihlaw kan ram sersiamnak ah hmainor u sih. Minung hi nunnak pakhat lawng kan ngeih i a sunglawimi nunnak ah mah nunnak hmanh ruat loin miphun caah ngeihchun nunnak pakhat pe a siangtu vialte upatnak sang bik kan in pek hna. Nunnak pakhat te lawng a simi hmanh hawidawt hna nih an pek siang lioah kan nun i kan dam ko ahcun kawl than a simi suingun chawva tal in zaanghleicuai ve cio rih ko u sih.

Tu hi thazang, chawva le nunnak le thlacamnak in kan ttuan khawh lio caan a si cang. Nunnak pakhat lawng a pe siangtu nusal/pasal tha hna vawlei hmun chung nan ralthatnak le nan i pumpek i miphun nan kilvennak cu chimrel dai ti lai lo. Pathian nih teinak thantar kan zar hlan tiang nundamnak he lam in hruai hna sehlaw kan miphun luatnak caah Pathian nih in hmang ko hna seh. Catialtu. Salai Pathawng

Be the first to comment

Leave a Reply

Your email address will not be published.


*