RALHRANG KAWLRALKAP NIH AN TLAIH THLUAHMAH CANG HNA

Myanmar ram ah thongthlak a tong mi thawng latu an tam chin. Myanmar ram ah hramhram in uknak lak a si hnu thok in July 25 tiang thawng latu 55 hren an si i cu chungah thawng latu 20 cu thongthlak ding in nawl chuah an si tiah Detained Journalist Information Myanmar phu nih an langhter.

Thawng latu pawl cu Article a phunphun in biaceih an si bantuk in a cheu cu biahalnak/hremnak sakhaan ah an um rih ko tiah a langhter.DVB thawng latu U Aung San Lin cu July 7 ah Sagaing ramṭhen, Watlat peng baceih zung ah Article 505 (A) le Article 52 in rianhrang le thong kum 6 tla ding in nawl an chuah.

Cun July 14 zongah Mizzima thawng latu Ma Nyein Nyein Aye cu Article 505 (A) in rianhrang le thong kum 3 tla ding in nawl an chuah ṭhan.June 11, Sagaing ramṭhen ah a ummi thawng latu Ko Ye Swe cu SAC ralkap nih a inn ah an tlaih.Sagaing khua, Irrawaddy tiva khatlei Mandalay, June 26 ah Irrawaddy thawngzamh in hmanthlak thawng a latu Ko Zaw Zaw cu Article 505 (A) in sualphawt a si.

Thawng latu pawl hi thawngpang ṭialnak lawng in siloin duhlonak a langhtertu pawl lungthawhter le phung he aa kalh ruangah tlaih an si tiah Major-General Zaw Min Htun nih a rak chim bal.Hramhram in uknak lak lio caan chungah thawng latu thongthlak an ton leng ah a thimi zong an um.Thawng latu Ko Soe Naing cu 2021 December 10 Silent Strike ni ah an tlaih i bia an halnak ah a thi.

Federal Journal Editor Sai Win Aung cu 2021 December 25 ah Karen ram, Laykaykaw kahdohnak kong thawng a lak lioah hriamngan nih a khen i a rak thi.Chin ramkulh hrambunh a simi Khonumthung Burmese thawng latu Salai Tui Dim zong 2022 January 8 ah Matupi -Hakha lamcung khuate ah khuami 10 he SAC ralkap nih an rak tlaih hna i an rak thah beh.

Hramhram in uknak lak a sihnu ah 7 Days News, Delta News Agency, DVB, Kamayut Media, Khit Thit, Mizzima, Myanmar Now, Myitkhina News Journal, Tachileik News Agency, The 74 Media, Zeya Times le a dangdang media tampi SAC nih License chuhpiak an si. Credit:The Chinland Post.

Be the first to comment

Leave a Reply

Your email address will not be published.


*