MIN AUNG HLAING CAAH CUN THINPHANG SI KO CANG

Min Aung Hlaing sualnak vialte cu piahkhan ah zohkhawh dingin timhtuahnak an ngei. Ralhrang kawlralkap pawl ICC ah taza cuai dingin tehte ting 4 renglo kan ngei cang tiah NUG nih an thanh. NUG nih ralhrang kawlralkap sualnak ting 4 renglo an ngei ko nain zohfelnak thatein kan tuah tthan lai i, International Standard he aa tlakmi tehte 200 hrawng lawng ICC ah kuat a si lai tiah a chim chih.

Kawlram chung buainak ah tawhtlaitu a hrampi cu Min Aung Hlaing hi a si i, thong chung ah a um cang dingmi asi lio ah lengah a um ko rih mi hi rianrang in a konglam ceihkhan a si khawhnak dingah ICC le UNSC cun Interanational level i, tazacuai i, a konglam ceihkhan ning lam pathum kan timhlamh tiah a chim tthan rih.

Culawng siloin Min Aung Hlaing telh in kawlralkap pawl cawlcangh ning le thahnawnnak an tuahmi vialte hna hi piahkhan tuah i langhter ding zongin timhtuah asi. Atu ah cun Online piahkhan bantuk in a um i, a hnu ahcun inn sak i, zohkhawh ding tiangin tuah a si lai tiah Dr Sasa nih a chim. Hi bia hi Dr. Sasa nih NUG Press conference ah a chimmi a si. Biachap. An i timhtuah ning atlamtlin ahcun aa muai cawk te lai lo.

Thawngpang dang: Hakha le Falam ah a ummi ralhrang kawlralkap le palek covid zawtnak a ngeimi an um. Falam ah a ummi ralhrang kawlralkap LIB 216 hna cu covid zawtnak an ngei tiah Falam CDM Supporter nih an langhter. Cun Falam khua Indoor Stadium ah a ummi ralhrang kawlralkap minung 30 chungah minung 15 zawtnak an ngei tiah an langhter chih tthan.

Hi konghe pehtlaiin Falam sizung ah sibawi a ttuanmi pakhat nih a chimmi cu kanmah lei nih cun fiangtein kan thei hna lo. Zawtnak an ngei timi thawngpang tu cu kan theih. A zawmi hna nih sizung ah an i thlopbul lo i, an mah an umnak hmun ah an i thlopbul i asi men lai tiah Zalen thawngzamhnak ah a chim. Hi konghe pehtlaiin Hakha a ummi kong zong a tanglei bangin langhter a si.

Hakha ah a ummi ralhrang kawlralkap LIB 266 ah zawtnak a ngeimi hi minung an si i, palek a simi nu pakhat zong zawtnak an ngei tiah an chim. Hakha ah a ummi ralhrang kawlralkap le palek hna hi a liamcia nizan june ni 24 ah khan zawtnak an ngeih hi an hmuh chuah hna tiah langhter chih a si.