KAWLRALKAP RALHRANG NIH NU PAHNIH AN TLAIH HNA EE

Ralhrang kawlralkap nih nu pahnih an tlaih hna. Nizan March ni 20 zanlei suimilam pathum hrawngah ralhrang kawlralkap hna nih Monywa ah tleirawl Nu pahnih an tlaih hna. Mah Nu pahnih hna hi Monywa le Botalin lampi Monywa khuapi luhnak check gate ah ralhrang nih an tlaih hna hi a si.

An tlaihmi Nu pahnih hna cu Botalin in Monywa ah kal aa timmi an si i Motorcycle in an ra. Ralhrang nih an dirter hna i an check hna. An phone an check i an phone chungah social media ah an hmanmi pawl an zoh piak hna. Cu ahcun ralhrang kawlralkap dohkalhnak an rak post siseh kut sermi meithal hmanthlak pawl an hmuh caah an tlaih hna hi a si.

Tutan ah ralhrang kawlralkap hna nih an tlaih mi tleirawl pahnih hna hi Monywa khuapi chungah a ummi le thilthitnak ah rian a ttuanmi an si. An min Shun Le Nanda le Ma Aye Thu Zar an si tiah thawngthanhnak an tuah.

Adang. Ralhrang kawlralkap nih CDF ralkap minung pahnih an tlaih hna. Matupi Myone, Lailenpi in Htaybaui khua lei ah a kalmi ralhrang kawlralkap hna nih CDF Matupi chungtel pahnih an tlaih hna. Minung pakhat cu an hrem hnu ah an thah tiah an langhter. Athimi ruak cu hmuh a si ko nain apawngkam ah bomb an chiah caah lak khawh asi rih lo.

Cun an tlaihmi pakhat zong ralhrang kawlralkap nih an thah lai tiah zumh a si. Asinain a ruak tucu hmuh a si lo tiah an thanh chih. Tutan ah an tlaihmi hna hi kahdohnak ruangah an tlaihmi hna asi lo. Bomb hmanh mi nih vok a puah hnawh i va lak ding an kalnak ah ralhrang nih an bawh hna i an tlaih hna hi a si tiah a chim.

Be the first to comment

Leave a Reply

Your email address will not be published.


*