APOI KO. RALHRANG MINUNG 20 AN PAWN CHUAH HNA

Karenni, Demoso peng ni chuahlei ah a ummi ralzaam umnak hmun le ralzaam ngandamnak a zohkhenhtu hna an umnak hmun ah ralhrangbu 20 hrawng nih an umhmun an rak chuh hna caah ralzaam hna cu hmun dangah an zaam hna tiah theih a si. Ralzaam pakhat nih “tuzing June 19 ah khan a si. ralzaam hna ngandamnak lei a zohkhenhtu hna umnak hmunah an va kal i an sikhan ah umhmun an khuar.

Ralzaam hna nih kan tih hna caah hmun dangah kan i thial. Ralhrangbu pawl nih an dinti zong an kan thaan ter, a phunphun an kan fial” tiah a chim. Khuami pakhat nih “ralhrangbu hna hi ram ah an vak, ralzaam hna an hmuh hna ahcun an duhmi poh an fial hna. Meithal he an si caah an tih i an zaam. Siikhan ah umhmun an khuar caah ngandamnak lei a zohkhenhtu hna zong rian an tuan kho ti lo” tiah a ti.

Kan hnu June 15 ah khan Karen mipi ralkap (KNDF) le ralhrangbu karah kahdaihnak an tuah hnu June 17 thawkin ralhrangbu pawl Demoso lei ah biatak tein thazaang an i chap. Zeitindah an in chawnh cu kan theih lo. Tlangcung miphun dang hna zong nih kanmah lei hi kan ruat pah ve ulaw kan duh ngai tiin ralzaam pakhat nih thil si ning a chim. KNDF le ralhrangbu kar ah chihkhat kahdaihnak an tuah nain ralhrangbu lei nih Demoso peng khua hna cu meithal ngan he an kah, khua chungah an luhhnawh hna pin ah khua luhchuah nak lam le mipi tlunkal nak cu an chek cuahmah ko tiah theih a si. TCP

Thawngpang Dang:UN General Assembly meeting ah NUG cozah in Kyaw Moe Htun cu ai tel. Culawng siloin biachimnak caan zong an pek. Kyaw Moe Htun nih a chimmi cu hibantukin lungtlin hnatlaknak kan tuah i, kawlram ah hriamnam zuar lo dingin biachahnak kan tuah khawhmi cu kawlram buainak ah tampi tthathnemnak angei lai tiah ka ruah.

Sihmanhsehlaw hi bantuk lawng cu kawlram mipi kan i ruahchanhmi a si lo. ASEAN ah siseh vawleicung ramkip ah ralhrang kawlralkap cozah palai lawng siloin NUG palai le tlangcung hriamtlai palai cun mipi lei in palai tibantuk hna zong thatein nan chawnh biak ve hna a hau. UN chungtel vialte hopaoh nih ralhrang kawlralkap cozah nan cohlan lo ding abiapi i, pehtlaihnak tuah hna hlah ulaw a ttha bik lai.

Ralhrang kawlralkap sin ah hriamnam zuar lo ding tiah biachahnak tuahmi hi cu a min lawng a si i, AA-NAA in khamhnak a um lo tikah nawlpek bak in khamnak hi um kho sehlaw mipi nunnak tampi kan khamh hna lai. Cu thil cu kawlram buainak ah a biapi taktak pakhat le Democracy lamtluan a kal khawhnak dingah a biapi tuk mi pakhat a si tiah a chim.

Tutan UN General Assembly meeting ah vawlei cung ram 119 hna nih Kawlram sin ah hriamnam zuar lo dingin lungtlinnak an ngei i, ram 36 cu an lungtlinnak le tlinlonak an langhter lo. Hi lio ah Belarus nih cun a dohkalh ve. Akarlak ah a dirmi ram 36 chungah hin Tuluk le Russia cun Brunei le Cambodia, Thailand hna zong an i tel. Lungtlinnak angeimi chungah Malaysia le Phillippines le Singapore, Vietnam hna zong an i tel ve.

Thawngpang dang: USDP Party cu an rak celh bak ve lo hih. Ralhrang kawlralkap dirkamhtu USDP party nih US le UK taanzung ralrinnak an pek hna. USDP Party nih thanhnak an tuah mi cu US le UK tanzung nih Kawlralkap hna nih Magwe ramtthen khua pakhat an khangh i, kum upa pahnih an nunnak a liam chih tiah an ti. Hi bantuk thilcang hi fiangtein dottletnak tuah hnu lawngah biadik an thanh ding a si.

Biadik biahman taktak theih hlan in thanhnak an tuah mi cu a dik lomi thil a chuahtertu asi pin ah a tuartu le ram mipi caah attha lo. Ram le uknak pakhat khat hmuitinh ngei in sualpuhnak a si ahcun phunghrampi an kalh asi i, ramchung daihnak an buaiter. Cu ruangah tihraam phun in thanhnak an tuah ahcun kan dohkalh bak tiah ralrinnak bia an langhter.

Nai khua khanghnak konghe pehtlaiin US Taanzung nih thanhnak an tuahmi cu Ralhrang kawlralkap hna nih Magwe ramtthen ah khua pakhat an khangh dih i, kum upa minung pahnih zong an thi, Hi bantuk dawhcahlo sualnak hi tlangcungmi hna sin ah an tuahmi lawngte asi. Mah bantuk cawlcanghnak hi ralkap nih minung nunnak zeihmanh ah an rel lo tinak alanghter mi a si tiah an ti.

Be the first to comment

Leave a Reply

Your email address will not be published.


*