AN RUAHNAK AI DANG OR KALH KO CANG TI A SI CANG

Ralhrangbu nih NLD party cu hrawh dingin a phun phun in a zuam peng nain China nih NLD party hrawh cu a duh lo tiah theih a si. May 21 ah UEC le ramkhel party hna tonbiaruahnak ah UEC chairman U Thein Soe nih NLD party cu ningcanglo le upadi kalh in rian a tuan ruangah hrawh ding le hruaitu hna cu dantat ding an si tiah zapi theih in a chim hnuah 2020 rampi thimnak cu a felfai mi thimnak a si lo tiin July 26 ah hrawh a si.

Hi kong he pehtlaih in UN special envoy to Myanmar Christine Schraner Burgener nih ralhrangbu hruaitu Min Aung Hlaing cu a mah nawlngeihnak a hmun ding lawng a ruah mi a si caah NLD party hi a hrawh taktak lai phan a um ngai tiah August 11 ah a chim.Mah bantukin boruak kar ah China cozah zong nih NLD party hrawh ding cu a duh lo tiah ralhrangbu hruaitu hna sin ah a chim tiah theih a si.

Hi bia hi August 12 ah ralhrangbu ramdang vuanci U Wanah Maung Lwin le China, Kawlram palai Chen Hai he online biaruahnak ah a chim mi a si i, mah bia hi China nih zapi theih in a thanh lo nain NLD party hruaitu le Beijing i China mithiam pawl online biaruahnak ah NLD hruaitu hna sin ah a chim tiah NLD chungtel cheukhat nih an chim.

China nih Kawlram kongah ralhrangbu lawng si lo in NLD zong pehtlaihnak a tuah peng tiah theih a si i, Communist Party of China (CPC) zong nih China le Kawlram pehtlaihnak ah NLD a biapit ning, CPC cu NLD bantukin ram pahnih pehtlaihnak tha kilven ding le thancho dingin tuanti kan duh tiin NLD, CEC sin ah July 21 ah khan phungningte in ca a kuat tiah theih a si.

NLD cozah lio ah China le NLD hi pehtlaihnak tha a ngei mi an si i, ralhrangbu nih uknak a lak hlan 2020 January thla China president Xi Jinping Kawlram a rak tlawn lio ah NLD cozah he dollar billion tampi man construction project hnatlaknak zong an ngei. NLD zong nih cozah a si hnuah an chungtel, mino le MP 100 leng cu 2016 thawkin China ram ah a rak thlah bal ve.Asinain,China nih hramhram in uknak a lak mi ralhrangbu a bawmh peng mi cungah mipi nih China thiltuah ning cu an lung si lo ruangah Kawlram, China ram China embassy ah duhlonak zong langhter a si.TCP

CABIADANG :Nizan Thantlang bomb puahnak ruangah a nunnak aliammi Pu Hlei Bik fapa hliam a tuarmi zong tuzing ah hi vawlei nunnak in mual aa kan liamtaak tiah theih asi. Nizan bomb a puah ka ah Pu Hlei Bik a nunnak a rak liam i, hliam a tuarmi a fapa zong tuni ah a nunnak a liam ve tiah thawngthanh nak an tuah. Ngaihchiatnak a tongmi chungkhar Bawipa nih nan ngaihchiatnak in hnem ko hna seh.

Nizan thil cang Thantlang ah bomb a puak, Pu Hlei Bik a nunnak liam i 11 an i hliam, August 27, 1:15PM hrawng ah Thantlang Sianginn Sang ah bomb a puak, Pu Hlei Bik (kum 40) a nunnak a liam i, ake le kut a bul mi tiin aa hliam mi 11 an um tiah kan theih.Aa hliam mi hna cu; 1. Phir Cung kum 12 kum, 2. Biak Tling Cung kum 26, 3. Tha Peng Lian kum 28, 4. Bawi Lian Hum kum 29

Panganak. Tial Thawng kum 36, 6. Bawi Nawl kum 27, 7. Pu Mang Lian Chawn kum 56, 8. Fung Lian Thang kum 32, 9. Pu Than Ceu kum 50, 10. Tluang Bawi kum 29, 11. Uk Lian Kam kum 14 hna an si i Pu Hlei Bik (kum 40) cu a nunnak a liam, tiah kan theih. Hihi August 25 lio SAC ralkap nih an kah mi bomb a puak lo mi sidawh a si. Inn ngeitu nih leng ah an chuah i an zoh lio ah a puak i pakhat a thi, 11 an i hliam.

Thantlang sii-inn ah an kalpi hna i a zual deuh 2 cu Hakha sii-inn ah an lanh/kalpi hna,” tiah khuami pakhat nih The Hakha Times ah a chim. August 25 lio ah SAC ralkap le CDF-Thantlang kahdohnak lio ah Van Bawi Thang (kum 10) nunnak a rak liam i minung 9 an rak i hliam.

Be the first to comment

Leave a Reply

Your email address will not be published.


*