VAWLEIPI A HNIN TU MISUALPA CU BIACHAHNAK AN TUAHPIAK CANG

New Zealand ah Mosque tukdohnak atuahtu cu nunchung thongthlak dingin biachahnak an tuahpiak. New Zealand i, Christchurch ah a ummi Mosque pahnih ah thla acammi minung 51 meithal in akaptu Brenton Tarrant cu nunchung thongthlak dingin biachahnak an tuahpiak. Brenton Tarrant hi Ausralian asi i, kum 29 lawng aupa rih mi asi.

Nikum march 15 ah khan Mosque pahnih ah tukdohnak arak tuah. Thla an camnak hmun cu meithal in aluh hnawh hna i, zeibia chim loin akah thluahmah hna. Cun tukdohnak atuah lio zongah Live bak in aa thlah rih. Lainawn case 51 le thahnawn timhnak case 40 cun ralhrang cawlcanghnak case in sual an pek rih.

Hi konghe pehtlaiin High Court biacaihtu Cameron Mander nih atimi cu Tarrant hi nunchung thongthlak dingin dantat asi. Hi hmanh hi a zarih lo tiah ati chih. Cun a tuahmi thil vialte zong hi pakhat te hmanh aa ngeihchihnak kong zong a chim lo tiah a chim chih. Tarrant nih thilsual atuah hlan ah hin thatein timhtuahnak arak ngei dih cang tiah Prosecutor hna nih an chim.

Biacaih zung nih biachahnak an thanh zongah Tarrant hi a um ve ko. Asinain dantatnak an pek mi paoh dohkalh aa tim lo. Zeibantuk dantatnak a si zongah ka dohkalh lai tiah a chim ti asi. Fak piin dantat asi cu lawmh a um tuk. Kha thil a cangmi ruangah minung tampi fahnak kha a dam kho lai lo. Misual pa min zong auh a hau ti lai lo. Nun chung thongthlak hi aphu ko tiah PM Jacinda Ardern nih a chim.

Thil a rak canning cu nikum 2019 march ni 15 ah khan Brenton Tarrant nih Christchurch khua i, Al Noor Mosque cu meithal he aluh hnawh hna i, thlacammi hna cu akah hna. Cu hnu ah motor chungah meithal alak tthan i, a luh hnawh tthan hna. A chung ummi vialte hna cu akah chih hna. Cun akah lio hna ah hin aluh ah camera achiah i, fb ah live athlah chih.

Al Noor mosque a kah hnu ah Linwood Islamic Centre ah akal tthan i, leng ah a ummi minung pahnih akah pin ah thlalangawng akah rih. Inn chung a ummi pakhat cu arak chuak i, misualpa meithal pakhat cu a chuh khawh. Cu hnu ah mithattu Tarrant cu a zam colh. Cuticun police nih an dawi i, an tleih colh. An tleih hnu ah a chimmi cu tukdohnak ka tuah hnu ah khangh ka timh tiah a chim.

Brenton Tarrant hi vunrang pawl biapi ah chiah aduhmi a si i, Amah hi Australia, New South Wales ah a chuak. Apa hi hnawmhlawnhtu asi. A nu hi cachimtu asi. Kum 2010 ah khan hringtu apa nih a thihtak. Cu hnu ah Tarrant cu a rianttuannak in a chuak i, Asia le Europe ah a tlawn. Akhual tlawnnak in alungput hi aa thleng i asi tiah a pi nih a chim.

Aliamcia kum 2017 ah khan New Zealand ah a lut. Cun Muslim pawl tthuat ding kong hi timhlamhnak a rak ngei chung cang ti asi. Mosque a kah hlan ah hin a hlanken in thil umtu ning cang hi online ah catlap 74 tluk a chahmi Manifesto atimi zong apost. Hi thahnak a chuah thok in New Zeal cozah nih meithal phung zong an thlen colh.VLN

Be the first to comment

Leave a Reply

Your email address will not be published.


*